22: durante tratamentunan den korte tabatin por lo ménos 22 eksperto den korte riba seguro, inkluso funshonarionan di banko, eks direktornan na Ennia i abogadonan.

Punda— Un kantidat deskonosí di klientenan na Ennia ta tratando na haña kanselá nan penshun i seguro na e kompania, despues di e tratamentu den korte 3 siman pasá. Hasta promé di esei, tabatin un grupo purbando. Vigilante a trata na drenta den kontakto ku sr. Jose Jardim na Banko Sentral, kende no por duna deklarashon debi ku e kaso ta den proseso di korte.

Pero ta un hecho ku tin kliente purbando bastante dia pa logra haña nan sèn bek for di Ennia. Si kosnan sali fo’i man na Ennia, mas ku 40 mil suidadano na prinsipalmente Kòrsou i St. Maarten por keda perhudiká na Ennia Caribe Holding. Ta trata di alrededor di 100 mil pólisa di seguro repartí riba e islanan.  E situashon na Ennia ta unu serio i sin un intervenshon di Gobièrnu òf finansiamentu riba merkado di kapital, e kompania por kai den un problema serio.

Abogado mr. Harenman a duna di konosé den korte siman pasá ku Ennia ta den problema serio. E sla di e sakeo ta grandi segun e abogadonan di Banko Sentral. Na promé lugá ta trata di un daño dirèkt di 730 mion florin mas 273 mion florin na daño di kobertura pa totalisá kasi 1 miar florin. Segun Banko Sentral, Famia Ansary a pluma e kompania pa saka benefisio personal afó. Durante nan disertashon legal na e tres wesnan, e abogadonan en total 3 huntu ku Sabine Altena a bai den detaye riba e donashonnan i kostonan èkstra ku famia Ansary a hasi riba teritorio estado unidense, paga dividendo na nan mes i uza fasilidatnan di biaha mediante avion privá pa famia por bula bai vakashon.

Pero Ennia no por paga niun tenedó di pólisa pa seguro di bida sin ku nan tèrmino kanselá, esta madurá. Un situashon igual a sosodé durante e problema di Giro, unda wes a prevení tenedónan di kuenta na e banko di por eksihí pa e banko paga nan. Den un veredikto den kaso di Giro, wes a splika ku segun artíkulo 31 di e Kódigo pa Supervishon di Asuntunan Bankario Krédito, despues di anunsiá un medida di emergensha, e instituto di krédito no ta obligá pa kumpli ku demanda di pago. Un situashon similar ta aplikabel pa Ennia tambe den kaso di su seguronan di bida.  Den seno di un grupo di depositantenan na Ennia ta reinando un prekupashon serio. Interno na Ennia tin reunionnan urgente a tuma lugá pa plania senario. Entretantu, frakshonnan di MAN i Trabou pa Kòrsou a súplika un reunion di parlamento. Den korte tambe a bini dilanti ku Ennia sea mester dependé di St. Maarten i Kòrsou pa hinka sèn òf fia sèn serka e bankonan.