Desaroyonan di  marshenan lo hasi ku e zona di Otrobanda lo bira mas atraktivo.

Willemstad, — Fundashon Marshe ta manehá diferente marshe na Kòrsou entre otro tambe marshenan den área di Otrobanda. E plan ta pa desaroyá diferente marshe pa asina hasi e zona di Otrobanda mas atraktivo.

Ruthmairis Joseph di Fundashon Marshe a kompartí ku Fundashon Marshe ta atendé ku diferente plasanan ku tin den sentro di siudat entre otro Plaza Bieu, Sha Caprileskade kaminda e barkitos nan ta pará, i tambe e área di Fuik na Otrobanda pegá ku e taksinan i kaminda ta bende suvenirs, i tambe e zona di suvenir pegá ku Mega Pier patras di Renaissance Hotèl. Dia 5 di òktober último tabata e apertura di e plasa patras di Renaissance Hotel, pero segun Ruthmairis Joseph ta menshoná, ainda esaki no ta den ful swing , ya komo no tin e bendedónan ainda.

Ora e bendedó an tei, por mira tambe e or’ei kiko ta tur lokual tin ku drecha i lo pone un dak ku mester bini kaminda e bendedó nan aki lo por para, segun Ruthmairis Joseph. Despues ku e stèntnan pegá ku e taksinan ta kla empresarionan lo wòrdu transportá pa bai bende einan i kaminda ta Fuik na Otrobanda awor aki lo bira un zona di artista. E zona di artista lo bai tene diferente kos artístiko entre otro eventonan live di músika. E desaroyonan di e marshenan aki lo hasi ku e zona di Otrobanda lo bira mas atraktivo.

Por último, Ruthmairis Joseph a menshoná ku tin un zona tambe ku lo bai traha riba dje pero esaki no ta kla ainda kual ta keda ubiká na Otrobanda pegá ku Landsloterij. Ora esaki keda kla mas empresarionan tin chèns pa hasi nan negoshinan einan. Ruthmairis Joseph a indiká ku preisnan pa stèntnan na e marshenan ta varia.  Plaza Rondo por ehèmpel, ta un marshe kaminda e preis pa stènt ta hopi mas abou kompará ku otro plasanan den sentro di siudat. Plaza Rondo tei pa yuda empresarionan chikitu. Stèntnan di mas barata ta alrededor di 500 florin i esnan un tiki mas karu ta alrededor di 1000 florin i esaki ta un suma ku ta paga pa luna.

Ruthmairis Joseph a indiká si ku ta yuda empresarionan i duna nan oportunidat pa paga sea pa dia òf pa siman. Pa haña aksesibilidat na e plasanan Ruthmairis Joseph a indiká ku Fundashon Marshe ta papia ku empresarionan pa asina wak kiko e empresarionan su ideanan ta. Fundashon Marshe ta yuda promové e lokalidatnan i tambe ta purba na organisá aktividatnan riba por ehèmpel, dia di rei, 10-10-10, i dia di bandera pa asina atraé hendenan pa bini na e lokalidatnan pa kumpra seka e bendedónan.