Presidente di Federashon di Beisbòl di Kòrsou, Jedrek Magdalena ta optimista pa temporada 2024.

Willemstad,– Durante di e último reunion di FEBEKO, ekiponan huntu ku direktiva a akordá ku beisbòl “AA” lo ranka sali dia 1 di yüni den Tio Daou Ballpark.

Den kombersashon ku presidente di FEBEKO, Jedrek Magdalena el a splika Vigilante ku e aña aki lo hunga 5 buèlta i tur wega ta bai 7 inen. Tambe el a splika na Vigilante ku en prinsipio tur wega lo tuma lugá den Tio Daou Ballpark, pendiente pa wak kiko ta bai pasa ku Stadion di Rif. Manera ya ta konosí mester drecha hinter e infield di e stadion i FDDK no kier hasi niun gastu ainda, sin sa kiko ta bai pasa ku e stadion. Minister Cooper a bisa ku lo kita e stadion for di kaminda e ta, pero ainda no tin nada konkreto. Echo ta si ku pa kita stadion di Rif for di su sitio aktua, mester konstruí un otro stadion pa beisbòl promé i ta basta tempu kaba tin ku ta buskando un lugá adekuá pa por traha un stadion nobo. Di tur manera beisbòl “AA” pa awor aki ta bai hunga tur wega den stadion di Tio Daou.  E intenshon ta pa temporada regular tèrminá dia 10 di sèptèmber si hunga solamente un wega riba djadumingu i si hunga dos wega riba djadumingu, e temporada ta bai tèrminá den mei mei di luna di ougùstùs.