WILLEMSTAD – Gobièrnu di Kòrsou a manda un splikashon amplio pa Parlamento tokante e negosiashonnan ku Hulanda, e solushonnan lográ pa entre otro e problemátika di Ennia, pero prinsipalmente e manera kon Hulanda a postulá su mes durante tur kos. Gobièrnu no ta nada kontentu ku e manera ku Hulanda a diskriminá Kòrsou, ni tampoko e echo ku ta tuma represaya kontra Kòrsou pasó no a bai na nan amèn den e asuntu di fiansa pa Ennia.

Manera Vigilante a informá kaba ayera, Parlamento a risibí un splikashon dje solushon skohé pa ku Ennia, desviando for di palabrashonnan ku Hulanda i loke Hulanda tabata deseá pa Kòrsou hasi. Segun gobièrnu, Konseho di Ministernan di Kòrsou a yega na konklushon riba 5 di òktober, ku aseptashon di e oferta di e Sekretario di Estado di Relashonnan di Reino Alexandra van Huffelen tokante e fiansa di Ennia, lo tin konsekuensianan profundo pa kapasidat di fiansa den futuro, agèndanan di invershon, presupuesto i kresementu ekonómiko di Kòrsou.

A tuma e desishon despues di deliberashon amplio i tumando na kuenta e proyekshonnan ku Banko Sentral di Kòrsou i St. Maarten (CBCS) a hasi pa diferente alternativa i e konsehonan negativo di kolegio di supervishon finansiero (Cft) relashoná ku e modalidatnan di e fiansa di Ennia, un konseho ku por sierto Van Huffelen a bagatelisá den un karta na Tweede Kamer bisando ku den e kaso akí no por konsiderá Cft su deklarashon komo netamente ‘konseho’.

Gobièrnu di Kòrsou no por a ignorá e potensial konsekuensianan, pasó nan lo a hinka pais den un situashon finansiero-ekonómiko i sosial hopi vulnerabel pa un periodo prolongá (di 30 aña). Porlotantu gobièrnu a skohe pa un akuerdo kontrolá. Durante e próksimo lunanan ekspertonan di Banko Sentral i esnan di Kòrsou i St. Maarten lo traha riba kon lo ehekutá esaki. E meta ta pa protegé e derechonan di penshon di 30 mil asegurado i e interesnan di trahadonan di Ennia Caribe Leven NV (ECL), sin pèrhudiká e interesnan di pueblo di Kòrsou. Ta pone énfasis riba kooperashon entre CBCS i gobièrnunan lokal.

Van Huffelen a ofresé dia 6 di òktober un akuerdo di fiansa pa gobièrnu di Kòrsou, pa refinansiá e fiansanan relashoná ku e pandemia di COVID-19. Den e akuerdo akí, ta stipulá ku Hulanda lo refinansiá e fiansanan pa un periodo di máksimo un aña, ku un tasa di interes di 5,1% pa aña, na lugá di e 3,1% ku a primintí originalmente. Ademas a stipulá un suma di pago bèk di 32.560.000 florin, loke ta suma alrededor di 79 mion florin. Mester paga e montante akí pa 9 di òktober 2024.

Gobièrnu ta splika Parlamento ku ta trata pues di un akuerdo den kua a stipulá kondishonnan nobo ku un tasa di interes mas altu i un suma di pago bèk ku loke a primintí anteriormente. Segun gobièrnu, esaki a atribuí na e echo ku no a yega na un akuerdo tokante e fiansa di Ennia. Gobièrnu ta enfatisá den su splikashon na Parlamento, ku e evaluashon di kalidat dje solushon p’e problema di Ennia ta responsabilidat di CBCS i e paisnan konserní, ku supervishon di nos hof. Esaki komo reakshon riba e karta di Van Huffelen (di 9 di òktober ku Vigilante a informá tokante dje) na Tweede Kamer, den kua e ta hasi anunsionan ku gobièrnu di Kòrsou no a kumpli ku e solushon nesesario i ku p’esei tabata nesesario duna modalidatnan di refinansiamentu ménos faborabel na Kòrsou, kompará ku St. Maarten. Gobiernu di Kòrsou ta kritiká e ròl di Hulanda, ku ta afirmá ku Kòrsou ainda por haña refinansiamentu riba término largu, asina ku (promé ku 10 di òktober 2024) tin un akuerdo tokante e likidashon kontrolá di Ennia, ku ‘tabata evaluá pa Hulanda komo sufisiente sostenibel finansieramente’.

I den su karta di dia 6 di òktober, Van Huffelen a papia di ‘un akuerdo atministrativo tokante solushon pa Ennia, ku tabata evaluá pa ekspertonan di Estado (hulandes) komo sufisiente sostenibel i sólido finansieramente. Gobièrnu di Kòrsou ta kritiká e ròl di Hulanda, pasó awó ku no tin akuerdo Hulanda ya no ta partido mas den e buskamentu di solushon pa Ennia. Ta algu di nos. E evaluashon dje kalidat di e solishon ya ta den man di korte ku tin supervishon riba e ehekushon di areglo di urgensia dor di CBCS.

Represaya i diskriminashon

Gobièrnu di Kòrsou ta ekspresá su desilushon tokante e oferta di Hulanda, konsiderá komo un akshon di represaya. Gobièrnu a sinti ku Hulanda ta keda manda e mensahe ‘wie betaalt bepaalt’. Gobièrnu ta enfatisá ku Hulanda ta pone kondishonnan no faborabel pa refinansiamentu pa Kòrsou kompará ku St. Maarten, siendo ku ta trata di situashonnan idéntiko. I ta sugerí ku Hulanda (lesa: Van Huffelen) innesesariamente ta pinta Kòrsou pretu i ta diskriminá den su komunikashon ku Tweede Kamer. Segun Kòrsou, Hulanda a hasi maluso di poder pa limitá e kapasidat di fiansa di Kòrsou, poniendo kondishonnan inaseptablemente altu tokante e fiansa di Ennia, ku lo tabatin konsekuensianan grandi pa finansa di Kòrsou riba término largu.

Menasa

A asta menasá ku Kòrsou lo ta den ‘default’ si no firma e kondishonnan di fiansa inaseptabel denter un dia, siendo ni ménos ku un luna pasá a bisa Tweede kamer ku e islanan lo no por paga e fiansanan di COVID bèk ainda i ku Hulanda lo mester duna refinansiamentu di mas ku un aña kontra kondishonnan faborabel. Pa evitá un senario di ‘default’, gobièrnu a bai di akuerdo ku e kondishonnan di fiansa ofresé, pero bou di protesta i ku kondishonnan. Tambe gobièrnu ta konsiderá tuma pasonan hurídiko tokante e legalidat dje kondishonnan di fiansa di Hulanda.

IPKO

Gobièrnu ke diskutí e asuntu akí den enkuentronan polítiko-atministrativo tambe ku otro paisnan outónomo den Reino, i ta konsiderá pa trese e tema akí riba punto di agènda pa atendé durante e reunionnan interparlamentario di Reino, IPKO.