Martines a para duru den sala di parlamento splikando ku e no ta di akuerdo ku skòrsmentu di reunion ta birando kos di tur dia.

Punda,– Durante e reunion den parlamentu djabièrnè último, parlamentario Michelangelo “Loo” Martines a interumpí palabra di Minister Charles Cooper pa splika ku e no ta di akuerdo ku skòrsmentu di reunion pa dos siman.

Durante e debate kaminda miembronan di parlamento por a reuní tokante e desaroyonan den FKP, vários parlamentario a tuma nan oportunidat i duna nan diskurso i nan manera di pensa tokante e situashon aktual di FKP. Ora Minister di VVRP, Charles Cooper tabata duna su splikashon tokante e plan pa integrá e gastu di konstrukshon di kas den e proseso di pago di èrpacht.

Cooper tabata duna  splikashon ku tin plan riba mesa ku na momentu ku un habitante risibí su akte, e kas ta bira su propiedat kaminda e pago dje kas lo kana pa 60 aña. Dado momentu presidente di parlamento, Charetti America, a interumpí palabra di minister Cooper indikando ku miembro di parlamento, Loo Martines, ku usa su momentu di “interupshon”.

Mesora Loo a indiká ku e no ta di akuerdo ku e reunion di parlamento tokante e situashon di FKP, mester wòrdu di skòrs pa dos siman. E parlamentario ku ta representá partido KEM a indiká ku e no ta di akuerdo ku e kustumber nobo di parlamento ku reunion nan ta wòrdu di skòrs pa dos siman.

Martines a agregá ku e reunion tokante desaroyo di FKP ta un tópiko serio i alabes ta e tópiko di dia. Ta tópikonan di trahamentu di kas pa pueblo, pues e preguntanan ku otro parlamentarionan a hasi ta fásil pa gobièrnu duna kontesta segun Martines.

Cooper a duna kontesta tokante e prekupashon di Martines indikando e no tin problema pa traha te mardugá, pero ta e konseheronan di minister mester di tempu pa duna kontesta. Mi mester duna rèspèt na mi konseheronan i duna nan tempu pa duna kontestanan, Cooper a sigui splika.