Punda—Gobernadó Lucille George Wout, den su diskurso nashonal, a mustra su prekupashon pa e generashon di Kòrsou. Segun George Wout, nos a konfrontá vários krísis i manera nos tabata por, nos a lucha lanta atrobe – tin bia ku éksito, otro bia nò.

Segun e gobernadó, durante tur e añanan, semper a yama su atenshon ku den nos pais ta eksistí un konekshon profundo entre hende ku hende. P’esei totalmente den espíritu di fiesta di Pasku, e tin speransa. Speransa pasobra 10 aña di sirbi komo Gobernadó e la  mira desaroyo riba diferente tereno;  den nos bida riku komunitario, den asosiashonnan kreativo i den trabou boluntario dinámiko. I sí, e desaroyo ei ta kana un pia un pia i sigur no ku e velosidat ku lo e gusta di mira.  Sin embargo, atversidat tambe por sirbi nos di inspirashon. Inspirashon pa hasi e kosnan di un otro forma o di ahustá e tono. Mal edukashon, tantu di palabra komo di echo, no ta afektá solamente toleransia i solidaridat, sino e por provoká tambe distansiamentu i, den kaso pió, eksklushon. Nos historia ta duna nos un mensahe di konfiansa. E ta siña nos ku nos por pasa den e krísis mas fuerte ku tin i sali vensedó, basta nos lucha huntu.

E ta konvensí ku huntu nos por logra tantu mas, si nos konsentrá nos diversidat i sigui uni forsa. Esei ta e as den nos bará di karta ku ta permití nos konfronta e retonan ku nos ta enfrentá: kambio klimátiko, resepshon di inmigrantenan, enbehesimentu di nos poblashon i e falta di konfiansa den nos institushonnan i den nos demokrasia. Tur hende ku tin responsabilidat polítiko òf atministrativo tin e gran tarea di ofresé hende stabilidat i speransa.  Di atministrashon públiko boso por ferwagt ku meskos ku nan a lucha pa nos pas i seguridat, asina tambe nan lo garantisá boso pas i seguridat. E la bisa di ta na lado di Kòrsou i su pueblo komo hefe di gobièrnu i komo guardian di e pakto di Reino.

Nos lo ke un isla kaminda nos ta kuida otro, i prinsipalmente esnan ku tin nesesidat di un poko mas atenshon? … Sea ta trata di hóbennan ku ta risibí edukashon den un edifisio eskolar na mal estado, sea ta personanan ku nesesidat médiko, refugiadonan ku ta konta ku un trato humano òf ta henter un generashon ku a yuda konstruí nos pais i ku awor ta biba den un gran insertidumbre durante masha tempu, kisas demasiado tempu, pasobra e penshun ku nan a traha spar p’e ta na diskushon?