Nicolas Maduro, kende den oranan di djabièrnè tras di lomba a yega China.

CARACAS – Nicolas Maduro a pidi apoyá di gobièrnu chines den e wikènt tras di lomba pa di e forma aki e pais karibense por keda inkorporá den e grupo di ekonomia emergente BRICS, Brasil, Rusia, India, China i Suráfrika. Esaki ta loke el a katalogá komo e motor grandi di speransa di un mundu diferente.

Durante un entrevista duná na e agensia chines Xinhua, i transmití pa un kanal, e mandatario a bin ku tres akshon ku e ta konsiderá, mester keda realisá pa asina profundisá su relashon ku Amérika Latina i Karibe. Entre esaki tin e punto di fortalesé BRICS permitiendo ingreso di Venezuela, ku e apoyo di China, i di tur e paisnan.

Venezuela ta un di e 23 paisnan ku a ekspresá nan interes di drenta BRICS, ku durante kumbre selebrá luna pasá, a akordá ampliashon di e bloke di ingreso di Argentina di Arabia Saudi. Pero tambe di Egipto, Etiopia, Emirato árabe i Iran.

Relashoná ku esaki, Maduro a rekordá e aportenan ku e nashon karibense lo por hasi  komo e pais ku mas reserva petrolero di mundu, meskos ku tambe otro mineralnan importante.

Maduro ta di bishita na China, unda el a yega den oranan di djabièrnè anochi pa un estansia ofisial di seis dia, di kua e agènda no a keda publiká.

E yegada di Maduro a keda presidí pa esun di su vise presidente, Delcy Rodriguez, ku a reuní djaweps pasá ku e minister di interior chines, Wang Yi.