Intenshon: Segun e minister den Parlamento na novèmber 2021, e no tabatin niun mal intenshon ku e karta.

Punda—Un argumento ku minister Dorothy Janga a uza pa por a manda un karta di instrukshon na hunta di direktiva transitorio na BZV, tabata ku korte lo no trata nan petishon pasobra nan periodo komo direktiva a vense. Janga a manda su karta riba 18 di novèmber 2021 pa vereffenaars, pero for di Ougùstùs 2021, ya kaba korte a trata petishon di e direktiva transitorio. Esei a nifiká ku korte a respetá e maneho nobo den Hunta di Konseho na BZV.

Minister di Salubridat Públiko, Dorothy Janga Pieters, den su karta na e direktiva transitorio di BZV, no a tene kuenta ku e veredikto di korte riba 24 di ougùstùs 2021. Janga, den e karta sali fo’i punto di bista ku e periodo di maneho di e direktiva likidadó a transkurí. Un veredikto di korte den mesun disputa ta bisa otro. Esaki a konfirmá ku konseheronan di Dorothy Janga a malinformá e minister debidamente. Segun Janga, na momentu ku eks-minister Ben Whiteman a duna instrukshon pa disolvé e fundashon (konforme artíkulo 11 di statutonan di e fundashon) “vereffenaars” nan a wòrdu nombrá pa maksimal 18 luna. E periodo aki a vense, pa ta mas eksakto dia 15 di desèmber 2016. Den un tratamentu di korte, unda Cali Abraham Abdalah i Milton Nicasio Yarzagaray a entamá kontra di BZV, e demandantenan a eksihí pa Korte Superior konsiderá Direktiva di BZV no asesibel. Segun Abdalah i Yarzagaray, e direktiva transitorio no tin legitimidat pasobra nan periodo a transkurí. Remarkabel ta e hecho ku Minister Dorothy Janga tambe a uza mesun argumento den su intento pa ordená e miembronan transitorio di para tur proseso den korte. Segun e minister nan periodo a transkurí.

E konseheronan, kende a bisa e minister pa bolbe uza e argumento aki a mal uza nan konseho. Den nan veredikto di 24 di ougùstùs, e tres wesnan di Korte Superior a bisa ku e argumento aki “snijdt geen hout”. Esta ta un argumento sin pia sin kabes. Pa e motibu aki, korte na ougùstùs 2021 a rechasá e ponensia aki presentá pa Abdalah i Yarzagaray. Pa mesun motibu ta rason di kuestioná ta dikon Minister Janga tòg a presentá ku mesun argumento den su karta, miéntras na ougùstùs den mesun disputa riba balides di direktiva, korte a rechasá e ponensha. Un kos ta sigur, na momento Janga a manda karta, un di su konseheronan a mal inform’é.

Aparte di a mal informá e minister, e konseheronan di Janga a konseh’é pa entrega un karta na Korte di Apelashon pa para e proseso kontra di Abdalah i Yarzagaray. Korte, na e momentonan ei mester a trata un nota intermediario den e kaso. Korte di Apelashon riba 24 di novèmber 2021 a rechasá e petishon di parti di eks miembronan den Hunta di Direktiva BZV pa posponé tratamentu i kontinuashon di un demanda sivil. A hasi e petishon di posponementu abase di e karta di Dorothy Janga. Via dje e karta aki, abogadonan di e dos eks miembro den direktiva a trata na posponé un nota di korte riba un veredikto intermediario. Korte a rechasá e petishon di posponementu i rechasá sigui e petishon den e karta di Janga.

Den transkurso di siman, tabatin hopi argumentashon sirkulando si Minister Dorothy Janga a kometé un delito, dor di skibi i manda un karta pa direktiva transitorio di BZV i ordená pa para tur proseso den korte sivil. Tabata trata di un prosedura andando unda Korte ya a duna veredikto na 2019 i despues na 2021 i awor na 2023. Den e karta, e minister a ordená e direktiva transitorio pa stòp di proseder kontra di eks miembronan di direktiva, Abdalah i Yarzagaray. E pregunta ta si e minister a kometé e akto konsientemente òf ku mala fe. Un mandatario ku konsientemente maluzá su posishon òf funshon i hasi algu òf laga di hasi algu pa saka bentaha pa e mes òf pa otronan por wòrdu kastigá ku kastigu di prizòn di 2 aña. Esaki ta segun e Kódigo di Prosedimentu Penal konforme artíkulo 2:345. Segun e minister den Parlamento na novèmber 2021, e no tabatin niun mal intenshon ku e karta.