LIMBURG—Mal tempu a okashoná daño di suma rekòrt di 886 mion euro den Hulanda den 2022, segun asosashon di kompanianan di seguro (Verbond van Verzekeraars).

Mayoria daño (714 mion euro) a keda okashoná den 2022 pa tres tormenta ku a laga hopi destrukshon den februari. E suma di daño a alkansá mucha mas ku e suma di 500 mion ku kompanianan di seguro a kalkulá na promé instansha. E rekòrt anterior pa mal tempu ekstremo tabata den 2016. E aña ei kompanianan di seguro mester a paga 770 mion euro na daño. Awaseru torensial i tormenta ta kosta komunidat hopi plaka segun e asosashon di seguronan. E impakto di kambio di klima ta evidente. Pero ainda mester determiná si e kambio di klima a hunga un ròl den e suma rekòrt ku a pagan a daño den 2022. Ekspertonan di KNMI a menshoná anteriormente ku e kalentamentu global no a hunga un ròl signifikante den e tormentanan di februari.

E influensia di kambio di klima riba e tormentanan ta chiki i no ta kai den e variashonnan anual den klima di winter. Si t’asina ku klima kayente ta oumentá e kantidat di awaseru ku ta vincula ku e tormentanan segun KNMI. Ekspertonan a determiná ku e chens riba otro formanan di violensia natural ta mas grandi komo konsekuensia di kalentamentu global. Asina sientifikonan di klima ta kere e probabilidat ta grandi ku den West-Oropa den korto tempu hopi awa lo kai, manera den zomer 2021 ora tabatin inundashon den partinan di Zuid-Limburg, Alemania ku Belgika. Na Leersum Utrecht tambe hopi awa a kai. KNMI ta traha huntu ku e sektor di seguronan na mehorashon. Pa por bati alarma na tempu e instituto ta konstrui un sentro Early Warning Centre (EWC). E idea ta pa limitá e daño si risikonan por keda kalkulá delantá.