E turtuga di “Kokomo” ku a keda infektá ku e malesa di FP.

Caracasbaai,– E malesa fibropapillomatosis mihó konosí komo e malesa FP ta sigui afektá i alabes redusí e poblashon aktual di turtuga na Kòrsou.

Pa algun tempu kaba sientífikonan biológiko a diskubrí ku e poblashon di turtuga na Caracasbaai ta sufriendo di un malesa. E malesa konosí komo fibropapillomatosis(FP) ta kousa ku e turtuganan ta risibí tumornan straño riba nan kurpa. E tumornan ta kuminsá kousa daño na e turtuga na momentu ku  e tumornan kuminsá krese riba órganonan esensial di e turtuga kual por afektá e turtuga su abilidat di sobreviví. 

Den pasado Vigilante a kubri e situashon alarmante kaba. Den un entrevista anterior ku Ard Vreugdenhil i Ginah – Marie Marten a resultá ku nan ta notando último tempu ku tin basta turtuga ku vários tumor riba nan kurpa. Abase di investigashon ta trata di tumornan kousá pa e malesa fibropapillomatosis. Ya pa basta tempu kaba e malesa aki ta konosí di afektá turtuganan, pero ta promé biaha ku nos ta notando ku hopi turtuga asina tin e malesa ku ta saka tumor aki na Kòrsou. Segun Vreugdenhil, si nada no wòrdu hasí pa solushoná e malesa di fp, e poblashon di turtuga na Kòrsou por haña un sla duru.

Riba 14 di desèmber 2023, Sea Turtle Conservation Curacao(STCC)a publiká e notisia lamentabel ku e turtuga “Kokomo” a bin fayesé debí ku el a wòrdu afektá dor di e malesa di FP. Segun demas investigashon, a resultá ku e turtuga tabata un dje turtuganan ku a wòrdu investigá den e poblashon di Caracasbaai, pero ta e boto La Menta lo a diskubrí ku e turtuga ta malu riba laman. Mesora e boto a trese e turtuga na e laman di Vaersenbaai, kaminda boluntarionan di STCC a tuma e turtuga pa duna tratamentu médiko.

A skèn e turtuga, pero dòkternan no a diskubrí ningun tumor interno. Despues ku a kita e tumornan eksterno tòg e turtuga no tabata ke a kome nada. Despues ku e turtuga a fayesé, a hasi outopsia riba e kurpa di e turtuga kaminda e diskubrí ku tabata tin un tumor ku a blòkia i kibra e tripa di e turtuga.

No ta konosí ainda konbin e malesa di FP ta plamando bou di e poblashon di turtuga, pero e malesa ta afektando solamente e poblashon di “Green Turtle”. Aña pasá boluntarionan di STCC a logra sana e promé turtuga for di e malesa di FP. Pero e gastu tabata un gastu basta pisá. Segun informashon por ferwagt ku tratamentu di un turtuga ta sali 4 mil florin. E tratamentu médiko a kuminsá i operashon pa kita e tumornan. Despues di operashon e turtuga ta risibí remedi i vitamina pa asina evitá ku e tumor ta regresá. Unabes e turtuga haña su forsa bèk despues di kasi 4 luna STCC huntu ku vetenario Doest a liberá e turtuga na laman di Sint Joris.