Sharionis Simmons.

Nieuwe Haven—Tur 2.400 mata di mariwana ku outoridat polisial a bin deskubrí na Flip  Naast 81 tabata di e dama Sharionis Simmons. Esaki ta lokual Simmons mes a duna di konosé na Korte, ayera. Wes mr. Lieshout, no tabata muchu kombensé ku e dama tabata papiando bèrdat.

E área di Flip a bira un área konosí pa kultivo di mariwana. Segun korte, Simmons na òktober 2022, a yega di risibi un atvertensha riba un kaso di kultivo di mariwana den mesun área di Flip. E biaha aki tabata toka un kaso ku a tuma lugá na mart último. Riba 24 mart 2023, alrededor di 06.00or di mainta personal di Divishon di Krímen Organisá a tene un entrada hudisial na un adrès na Flip relashoná ku violashon di lei di droga. Durante di e entrada hudisial a haña i konfiská un kultivashon di matanan di mariwana. Na e sitio a detené un muhé Simmons., nasé na Kòrsou di 21 aña di edat.  Mesora despues a kuminsá ku e parti pa desmantelá e kultivashon di mariwana unda a ranka tur e palunan di mariwana pa asina por a bai deshasí di nan.

Ayera mas detaye di e kaso a keda tratá. Polis a bin deskubrí e plantashon di mariwana durante un búskeda pa outonan hòrtá. Na dado momento e polisnan a saka un drone pa bula den área di Flip i na Naast 81, e fotonan di drone a mustra riba un plantashon di mariwana. Mesora a organisá un redada i konsekuentemente a enkarselá Simmons pa mas investigashon. Ayera Simmons a splika wes mr Lieshout ku tur e matanan tabata di dje i ta e mes tabata kultivá esakinan. Pero tin dudanan. Wes a trata na saka e duda dor di puntra Simmons riba detaye di e kultivashon pasobra na polis, Simmons no tabata kier a papia nada.

Segun wes, Simmons ta dek pa miembronan di su famia kende ta esnan responsabel. Pero Simmons tabata kombinsente ku ta trata di su trabounan. E dama a nase riba 28 di mart 2002 i tin un yu di 5 aña. E la bisa ku e kas unda a bin deskubrí e kultivashon ta di dje pasobra su mama a regal’é e kas. Na e kas polis a deskubrí tambe ku tabata hòrta awa i koriente, pero riba esei no tabata or a akusá Simmons di dje. E dama di 22 aña a menshoná ku dia e la drenta e kas ya kaba e meter di awa tabata kitá.

Fiskal di Ministerio Públiko, mr Eva Bos e demanda 20 luna di kastigu pa Simmons kual 6 mester ta kondishonal. Wes a konsiderá ku Simmons no tabatin un karchi di kastigu, pero no tabata kombensé ku Simmons tabata papiando bèrdat. E la duna e mama hóben, 18 luna kastigu kual 6 kondishonal i 3 aña tempu di prueba. Su yu entretantu ta serka e tata, pendiente libertat di e mama.