WILLEMSTAD,—-Durante un enkuentro ku prensa di ayera, Fundashon Desaroyo Karnaval Kòrsou (FDKK) a presentá su plan pa Karnaval 2024. Manteniendo e slogan “Nos Karnaval”, FDKK ta enfatisá ku e karnaval di Kòrsou ta unu sumamente impaktante i importante i ku hinter komunidat di Kòrsou ta forma parti di e selebrashon.

E temporada aki lo ta aun mas kòrtiku ku temporada 2023 kual ta eksigí un preparashon i organisashon serio pa ku e 5 pilánan prinsipal manera: Apertura, Tumba Hubenil, Elekshonnan, Marchanan di karnaval i Klousura.

Kontinuando ku e vishon pa den 5 aña hasi e organisashon di karnaval unu independiente i tambe wardando riba e resultadonan di e simposio organisá pa departamento di OWCS huntu ku e universidatnan ICUC i UOC pa asina krese e produkto karnaval tantu lokal pero tambe internashonal.

Ta asina ku ‘Manchi’ a bisa ku: ”E enfoke di FDKK 2024 ta pa tin un karnaval sumamente strukturá, unda ku kreatividat, ambiente, seguridat i responsabilidat di kompatibilidat lo ta sentral.

Riba tèrmino largu lo bai konsentrá pa krese e produkto karnaval i asina oumentá mikro, pero tambe makro ekonomia durante e periodo aki.

FDKK ta konvensí ku na 2024 tambe Kòrsou lo konosé un karnaval bunita. Mirando e presentashonnan di diferente gruponan di karnaval, no tin duda ku esaki lo ta e kaso”.