WILLEMSTAD,– Señor Marlon Regales a manda un karta pa minister di hustisia Mr. Shalten Hato ku un proposishon di bini ku “Wardadó di Bario”.

Kriminalidat ta asotando nos isla i kriminalnan ta birando kada bes mas duru. Korantnan ta bòl di nan aktividatnan, anto e pueblo ta sinti su mes insigur.

E pueblo ta grita pa trankilidat i protekshon.

Segun Regales diferente instanshanan konserní ta hasi na máksimo esfuerso pero sin e resultado deseá. No tin kòntròl sosial mas, kada ken ta pa nan kuenta i esaki ta krea oportunidat pa e kriminalnan. Manera nos ta bayendo lo no por yega na e kantidat di polisnan ni por ekipá loke tin awor aki na e manera adekuá.

P’esei señor Marlon Regales despues di konsulta ku diferente organisashonnan no gubernamental ta ofresé gobièrnu di Kòrsou e solushon ku ta Wardadó di Bario.

E ta bisa ku rònt mundu tin e fenómeno ku outoridatnan ta pèrdè kòntròl riba e komunidat. Esaki ta bin dor di kambionan drástiko sosial i ekonómiko.

E ta sigui splika ku esaki nan ta bin dor di guera, trauma, violensia, mudansa, preshon síkiko, desempleo, materialismo, aktonan kriminal, kontrabanda, terorismo, industria i medio ambiente.

Gobièrnunan ta desaroyá tur sorto di inisiativa pa por kontrolá e komunidat.

Pa por remediá e situashon aki ta importante pa: mester tin un sistema di kòntròl i vigilansia.

Mester por reakshoná lihé i adekuá riba situashonnan ku presentá.

Mester tin un banko di informashon kaminda ta atkerí informashon strukturamentu, asina bo por antisipá riba situashonnan ku ta bai presentá.

Regales ta sigui bisa ku hopi di e situashonnan por wòrdu registrá riba mapa kaminda e Wardadó di Bario ta funshoná komo un fasilitadó den su bario.

Un Wardadó di Bario ta un hende intachabel, un nivel di pensa di HBO ku ta aktivo den su bario i ku ta respetabel.

E Wardadó di Bario ta atministrá tereno, mondi, laman i tur propiedat di gobièrnu. E ta hasi esaki dor di patruyá i atkerí informashon.

E tin outoridat pa investigá, kontrolá i parti büt. Kontrolá pèrmitnan, ora di sera, muchanan ku ta bai skol. E ta un mediadó den tur tipo di problema, trabou, skol i tur problema sosial.

Mester kontrolá tambe hende nan ku sali for di prizon òf ku tin kastigu alternativo.

Tambe ta yuda desaroyá evenementu i aktividatnan sosial, deportivo, kultural i ekonómiko.

Regales ta splika tambe ku un Wardadó di Bario ta aliviá tur ministerio manera GMN, HUSTISIA, VVRP, MEO, SOAW I ESKD.

Tur por kontribuí ku e Wardadó di Bario por bin mas lihé ku ta posibel i suavisá hopi reto ku nos tin.