Willemstad, — Alumno nan di Marnix College ta bon bezig atrobe. Na inisio di e aña eskolar aki alumno nan di 3PKL mester a traha na un proyekto relatá ku nan vak di ekonomia. E materia “Maatschappelijk Opbrengst” ta enserá pa hasi algu ku ta di benefisio pa nos komunidat.

Dor di e materia aki dosente nan di e vak ekonomia e bini ku un idea pa e alumno nan por hasi algu benefisioso pa komunidat den práktika. E idea ta enserá pa e alumno nan traha pakete di komestibel pa den temporada di Pasku pa famia nan ku ménos rekurso. Kada alumno tin ku hasi nan esfuerso pa yega na mínimo 25 produkto. I tambe nan mes lo bai repartí esaki n’e famia nan.

Segun dosente Damarys Martien nos hóbennan no ta masha konsiente di e konsepto di pobresa na Kòrsou i p’esei e idea aki a lanta. Nos hóbennan ta haña kosnan muchu fásil, nan tin e telefon di mas karu òf nobo, e kètsnan di mas karu òf nobo. I no ta komprondé ku tin sierto hende ku no tin e moda finansiero pa ku esaki. I ta asta tenta otro nan ku tin ménos. E idea ta pa laga e alumno nan mes bai hiba e produkto nan i mira ku propio wowo kon otro ku tin ménos ta purba na sobrebibí.

Ku ayudo di SOAW i fundashon Nos Grandi Nan a logra yega na 23 famia ku ta den nesesidat. Tin 23 alumno den e klas i kada alumno lo tin ku bai sòru pa un pakete. Tambe bou di guia di un otro dosente di ekonomia yùfrou Brunken tin un otro klas tambe ku a sòru pa traha mas pakete pa e misa di Protestant.

Marnix College a traha huntu ku instansia nan di seguridat pa yuda repartí e pakete nan aki. Nos ta masha agredesi  i un danki ta bai na KPC, VKC, Wardakosta, Brandweer i Koninklijke Maurechassee di a disponé pa yuda nos alumnonan pa kore repartí e pakete nan den diferente área. Kuminsando di Banda Bou te banda riba.   Na momentu ku yùfrou Martien a aserka e instansia nan aki, mesora nan no a duda i a bai di akuerdo pa yuda ku e inisiativa aki. Un danki inmenso di nos parti segun yùfrou Martien.

Tambe tabatin hopi donashon di entre otro alumno nan di skol mes i dosente nan ku tambe a kontribuí pa yuda otro famia nan pa pasa un dushi fin di aña. Ta nos mes tin ku yuda otro i guia nos hóbennan pa hasi esaki. Danki na esfuerso di dosente nan yùfrou Martien, yùfrou Brunken, yùfrou Liket i yùfrou Ilario ku a guia e dos gruponan di 3PKL di Marnix College Cas Cora. Nos di Marnix College ta deseá pueblo di Kòrsou pasa un dushi fin di aña 2022.