Momento ku e tim di aresto a hasi detenshon di e sospechoso.
Willemstad— Ayera e tim di aresto riba petishon di e tim di atrako a realisá otro aresto pa e kaso di atrako unda ku a logra di bai ku un botin formal di 250 mil florin.
Tabata di 27 di mart último den oranan di atardi ku a tuma lugá un atrako arma riba un dama den aria di Parke Industrial riba un dama na unda a logra di kita su tas ku pertinensha den dje I tambe un otro tas ku tabata kontené un suma formal di plaka kual ta trata di un suma di 250 mil florin . Ta trata di un dama ku tin e trabou di hasi kobransa pa un negoshi ku e ta traha pe pa despues e tin ku bai depositá e suma di plaka. E tiponan ku tabata envolví den e atrako tabata bon na altura di e moveshon di e dama ku suma basta grandi di plaka den su poder. Esaki a pone ku nan a para den aria d Brievengat den serkania di e parke industrial pa asina por a sigui e dama aki su pasonan. Tabata na momento ku e dama a presentá den e aria ei ku e tiponan a presentá den un Kia Picanto sin plachi di number unda dos hòmber ku arma den man mester a baha for di e vehíkulo i a menasa e dama pa asina por a kue e tas di plaka I tambe e dama su tas personal bai kuné. Despues di a poderá di e dama su tas i tambe e tas ku tabata kontené e suma grandi di plaka e dos tiponan aki a drenta bek den e Kia Picanto kolo shinishi sin plachi di number i a hui bai for di e sitio. Mesora e dama a alarma di e kaso di atrako i tabata un agente polisial ku tambe a tende e notisia i a mira e vehíkulo sin plachi di number pasa ku velosidat den direkshon di pabou a pidi asistensia pa asina por a kuminsá ku un persekushon. Esaki a pone ku a kuminsá ku un persekushon ku a sali di Brievengat drenta te den e bario di Buena Vista. Na altura di Blanquillaweg e tiponan den outo a saka man benta e tas afó pa seguidamente riba Bahamasweg a bin pèrdè kontròl dal kontra di un kura di kas. Tabata einan ku polis a logra di detené un di e tiponan miéntras e otro si a logra di kore drenta den un kura di kas ku sigur e botin den su poder.. Riba órden di un Fiskal Ousiliar a drenta den e kura pa kontrolá pero no a bin topa ku e otro sospechoso ku a bai ku e botin di 250 mil florin. Polis a logra di haña e tas di e dama pero sin e montante di plaka. A konfiská e vehíkulo i a bai warda ku esaki pa mas investigashon. Ayera a yega e dia ku e tim di atrako a hasi petishon na tim di aresto pa sali i detené e sospechoso ku dia di e atrako a logra di kore bai den Buena Vista. Tabata basta fásil pa identifiká e sospechoso ya ku ta sospecha ku e la bai kometé e atrako den su mes vehíkulo pero solamente a kita e plachinan di number. Esaki a pone ku ayera den oranan di atardi e señalá e sospechoso aki den un vehíkulo di e marka Vitz moviendo riba Winston Churchillweg despues di a sali for di e bario di Kanga. Di un forma espektakular ku a hala atenshon di basta outomobilista e tim di aresto a logra di blòkia e vitz kolo shinishi kasi nèt na e krusada Winston Churchillweg I Cubaweg pa asina por a detené e sospechoso. Mesora e la wòrdu transportá pa warda miéntras a konfiská e vehíkulo ku e tabata move aden. Seguidamente e tim di atrako a bai na kas di e sospechoso ku ta keda riba Cubaweg mes pa asina por a tene un entrada hudisial. Einan a listra den e kas I por a mira e reshèrshinan sali ku un tas ku kontenido. E kaso ta den investigashon I no ta ekskluí mas detenshon pa e kaso aki.