Ehèmpel: entrada den negoshi di Melkar ta un ehèmpel di lokual por spera durante 2023 pa 2024 riba agènda di aktividat na RST. En todo kaso, e unidat di RST tin “miónes pa gasta” i lo konsentrá riba tur sospecho ku nan tin riba labamentu plaka.

ZEELANDIA— Por spera ehekushon di mas entradanan hudisial durante 2023 pa 2024. Esaki den kuadro di un programa di finansiamentu mionario pa kuerponan d i RST den Hulanda Karibe, inkluso Kòrsou. Un bon ehèmpel ta e entradanan resien di RST na e kompania di tarheta digital, Melkar.

Pa 2024 yega 2025, Lo pone medionan finansiero èkstra pa kumpli ku palabrashonnan den kuadro di Landspakketten pa kombatí krímen ku ta mina na Aruba, Kòrsou i St. Maarten. Ta trata aki dje suma pues di 10,6 mion euro ku lo keda transferí for di e presupuesto pa Relashonnan di Reino pa e presupuesto di Hustisia i Seguridat.  Ademas lo transferí promé ku 2025 mas di 17,9 mion euro for di e presupuesto di Relashonnan di Reino pa esun di Hustisia i Seguridat pa RST, den kuadro dje asina yamá Convenant financieringssystematiek, pues e kombenio tokante e sistemátika di finansiamentu.

Unidatnan di RST ta bastante aktivo na Kòrsou pa trata na prevení desaroyonan di krímen internashonal na islanan ABC, prinsipalmente na Kòrsou i na St. Maarten.  Ta trata di aktividatnan físiko di krímen komo aktonan sibernetiko. E sekshon físiko di e investigashonnan ta enserá entre otro pèrsigui i solushoná gèngnan latino amerikano operando na Kòrsou manera por ehèmpel Los Lobos, kual organisashon ya te rekonosé di tin 3 pia. Aparte di un presensha fisiko di organisashonnan internashonal.

Ta resultá ku RST tin un tim spesialisá pa analisá di data elektróniko. E tim yamá”Crypto- Analyse Team”(CAT Carib) ta enkargá ku desifrá informashon di data elektróniko. E tim ta usa un manera sistemátiko pa analisá nètwèrknan di persona i asina saka informashon elektróniko afó. Unabes data di un persona sospechoso wòrdu di krak i esaki por wòrdu analisá, CAT Carib ta konsiderá esaki komo oro. E data aki den mayoria kaso ta duna in indikashon kon e mundu kriminal ta operá den e islanan den Karibe.

Segun Minister di Hustisia di Hulanda Dilan Yeşilgöz-Zegerius kada dos aña e partnernan enkargá ku e análisis di imágen di krímen (criminaliteitsbeeldanalyse, CBA) ta traha un rapòrt tokante Karibe. E aña akí a bolbe traha un CBA. A base di esaki ta traha riba maneho pa loke ta trata investigashonnan i akuerdonan denter dje kadena aplikashon di lei tokante e despliegue. I den e CBA ta señalá ku e pandemia di Covid-19 a hasi e tres paisnan den Karibe mas vulnerabel pa kresementu di krímen transnashonal. “Deterioro di e situashon ekonómiko, mas tantu desempleo debí na pèrdida di trabou i e oumento di imigrashon ilegal a kontribuí na esaki.”

CBA ta identifiká tambe un riesgo mas grandi di korupshon, labamentu di plaka i krímen sibernétiko. Debí na e situashon ekonómiko i e redukshon di e presupuestonan, e disponibilidat di empleadonan denter dje instansianan di aplikashon di lei ta oumentá. E koperashon investigativo di parti Karibe lo sigui konsentrá riba e fenómenonan akí. Asina a keda trata den reunionnan di Tweede Kamer. Último añanan Hulanda a invertí fuertemente den entre otro kombatimentu di krímen ku ta mina. E Ministerio di Asuntunan Interno a pone èkstra rekurso pa esaki disponibel, pa duna RST (rechercherchesamenwerkingsteam), e Ministerionan Públiko i e Korte Komun di Hustisia mas kapasidat. E invershon akí lo oumentá te na 12,9 mion euro anual na 2025, banda di e 12 mion euro anual ya establesé.”