Abogado Kleist a splika ku su klientenan a wòrdu kondená muchu pisá.

NIEUWE HAVEN,– Abogado Kleist a splika bon kla den korte ku su kliente Olirfred Javier Rivas Chrino a risibí un kastigu muchu haltu relashoná ku akusashon riba importashon di arma i droga.

Investigashon den kaso Mulata i kaso Edison a finalisá ku 4 hòmber mester a presentá dilanti korte di apelashon relashoná ku importashon di 24 arma di kandela, 127 kilo di kokaina i 49 kilo di mariwana. Alabes outoridatnan a haña kantidat di bala skèrpi. Korte den promé instante a kondená Olirfred Javier Rivas Chrino na un kondena di 13 aña kual tantu e akusado komo e abogado a indiká ku e kastigu ta muchu haltu.

Abogado Kleist a kompará e kaso di su kliente ku otro kasonan similar na Hulanda, kaminda e konklushon dje abogado tabata ku e huesnan na Hulanda tabata imponé kastigunan muchu abou. E reklamo di Kleist ta riba mesun liña ku reklamonan di otro abogadonan den otro kasonan anterior.

E mesun abogado ku a hiba defensa pa Rivas Chirino a splika ku su otro kliente, Rianchelo Elvira tambe a risibí un kondena muchu pisá. Ta asina ku korte den promé instante a kondená Elvira pa un kondena di 10 aña, pero segun Kleist ora kompará e kaso aki tambe ku otro kasonan similar, por nota ku e huesnan na Hulanda sa imponé kastigunan muchu mas abou. Tambe e abogado di Elvira a splika ku su kliente no tin un karchi di kastigu, pues un kastigu di 10 aña ta muchu pisá.

Abogado Athena Sulvaran tambe a reklamá korte ku e kastigu di su kliente kende ta Javier Phelipa tambe a risibí un kastigu muchu haltu. Korte den promé isntante a kondená Phelipa na un kastigu di 10 aña. Pero ora Sulvaran hasi su investigashon, e abogado a diskubrí un kaso similar kaminda den e otro kaso e akusado a risibí un kastigu mas abou. Segun e defensa di Phelipa, tin un otro kaso di un persona residivista ku alabes no a duna su kolaborashon durante e investigashon polisial. Alabes den e kaso aki tabata tin mas droga konfiská i e armanan hañá si tabata untiki ménos. Sinembargo e akusado residivista tabata tin ròl komo kabesante, pero korte a duna un kastigu di 7 aña. Pues sufisiente rason ku Phelipa a risibí un kondena muchu pisá.

Fiskal mr Eva Bos a pidi korte pa mantené e mesun kastigu ku korte den promé instante a imponé pues ku Rivas Chirino mester keda ku su kastigu di 13 aña, Phelipa i Elvira mester mantené nan kastigu di prizòn di 10 aña.

Durante un rueda di prensa entre e ministernan di hustisia di reino Hulandes, Franc Weerwind kende ta fungi komo un minister Hulandes a splika ku, e no por duna deklarashon si huesnan i ministerio públiko den islanan karibense Hulandes ta kondená i rekomendá kastigunan muchu haltu si kompará esaki ku Hulanda. Segun Weerwind e no por duna ningun deklarashon na prensa tokante e asuntu aki komo ku ta trata di un asuntu ku no a wòrdu investigá ainda. Alabes e minister a splika ku enbèrdat el a yega di tende tokante e reklamo aki den e region Oropeo, pero riba nivel Oropeo tampoko e minister no por duna un punto di bista, simplemente riba e echo ku no tin sufisiente informashon.

Por último e minister di protekshon legal, Franc Weerwind a splika den pasado ku úniko manera ku e por duna un deklarashon ta si e asuntu aki wòrdu investigá i analisá riba un manera korekto. Sinembargo ta trata di un análisis asina ta keda algu kompliká komo ku tur kaso ta varia enorme. Ora wak un kaso di importashon di droga, e minister a agregá ku mester wak e ròl di e akusado, kuantu droga a wòrdu importá i si e akusado ta un residivista.