WILLEMSTAD, — Segun karta di minister Larmonie-Cecilia mester inkluí indexering di ònderstant, AOV, i salario mínimo den lei pa yuda forsa di kompra di siudadano.

Aktualmente no tin indexering di ònderstant, di AOV, ni di tampoko e salario mínimo, kual ta pone ku e forsa di kompra di kasnan di famia ku un salario abou ta baha. Esaki ta kondusí na pobresa. Diferente parlamentario a boga últimamente pa oumentá di forsa di kompra di siudadanonan. Algun tempu pasá, frakshon  PAR a indiká den karta na Presidente di Parlamento, ku segun investigashonnan hasí na Kòrsou e grupo di personanan ku ta kobra AOV, ta den rísiko mas haltu pa kai den pobresa, ya komo 9 mil di kobradó di AOV di e totalidat di 51 mil hende ku ta kobra AOV, tin e AOV komo nan úniko entrada.

Eduard Braam (MFK) a puntra den reunion den sala di parlamento di 22 di yanüari, kiko gobièrnu ta hasi pa oumentá e forsa di kompra di siudadanonan. E parlamentario a duna un ehèmpel den kual e a menshoná AOV ku for di 2013 no a wòrdu indeksá. Gwendell Mercelina (PNP) ta splika ku AOV ta e fundeshi sosial mas importante i esensial di desaroyo i bienestar di nos grandinan den e pais aki. Mercelina ta puntra kiko ta e kosnan ku por hasi riba korto plaso pa yuda e forsa di kompra di penshonadonan. Ya komo preisnan ta subi relativamente, pero esaki por afektá e penshonado hopi mas di lokual nos ta kere.

Gibi Doran (MFK) a ta splika ku e sèn di penshonadonan no ta yega i ta yega un momentu ku lo mester bai oumentá i indeksá penshunnan. Pero, lógikamente mester tin sufisiente entrada tambe pa por subi penshunnan. Ana-Maria Pauletta (PAR) ta puntra si e subida di AOV lo ta unu temporal i òf si esaki ta indefinitivo. Quincy Girigorie (PAR) ta puntra kiko minister Larmonie su vishon ta riba AOV ya komo mester konsiderá vergrijzing e poblashon ku ta birando bieu. Pues despues di e reunionnan i preguntanan hasí dor di parlamentarionan minister Larmonie-Cecilia ta kontesta den su karta i ta proponé pa indeksá salario mínimo, ònderstant, i AOV, outomátikamente segun e index di preis di konsumidó.

Minister Larmonie-Cecilia ta bisa ku pa realisá esaki mester inkluí indexering den lei. Di e forma aki por midi e forsa di kompra di kasnan di famia outomátikamente. Banda di esaki lo mester bin un klóusula den e lei ku ta duna e minister responsabel e posibilidat pa no indeksá si situashonnan spesial presentá. Pues pronto parlamento lo reuní atrobe pa asina atendé e lei di AOV i  e trabounan di parlamentario riba AOV lo kontinuá.