PUNDA,– For di e rekomendashon por nota ku Social Economische Raad(SER) tin prekupashon riba e echo ku hopi hende no ta bon formá riba e aspekto finansiero.

Gobièrnu di Kòrsou ku yudansa di entre otro banko sentral ta tratando na oumentá e kantidat di klientenan ku ta usa un kuenta bankario. Pa e klientenan aki yega na un kliente bankario, mester redusí e drèmpel aktualmente pa yega na un kuenta di banko. E inisiativa ta forma parti di un strategia finansiero pa modernisá nos sistemanan di pago i alabes oumentá inklushon sosial ekonómiko. Mas aleu, investigashon di banko sentral a demonstrá ku un kantidat di habitantenan di Kòrsou i Sint Maarten no tin akseso na un kuenta bankario.

E lei di kuenta bankario básiko ta yuda konsumidónan pa risibí un kuenta pa hasi pagonan kuné. E konsumidó por stòrt i lanta su sèn, ehekutá transakshon nan bia plataformanan digital i manda sèn pa otro kuentanan bankario. E kuenta bankario básiko ta un stap importante mirando ku mas i mas kompania no ta aseptando sèn kèsh mas.

Tur ku habri un kuenta di bankario básiko lo risibí e oportunidat pa stòrt solamente 3 mil florin. Esaki lo ta pa kombatí labamentu di plaka riba término largu. Mas aleu, e kliente ku ke habri un kuenta bankario básiko no por a wòrdu kondená den último 8 aña pa falsifikashon di dokumentashon. Sinembargo, SER a nota di e informashon preokupante kual ta ku hopi habitante tantu na Kòrsou komo Sint Maarten no tin bon formashon finansiero. 53% di habitantenan riba Kòrsou i Sint Maarten no tin edukashon tokante finansas. I p’esei SER ta rekomendá gobièrnu pa bini ku un kampaña di informashon pa eduká e pueblo tokante informashon finansiero. Esaki ta keda lográ dor di ehekutá e kampaña ku diferente partner.