WILLEMSTAD, — Dia 8 di febrüari parlamento a tende reunion públiko den deliberashon ku minister di hustisia i minister di desaroyo ekonómiko enkuanto atrako riba turista. Minister di desaroyo ekonómiko a keda representá dor di Min SOAW ya komo esaki no tabata por tei presente den sala di parlamento.

Gibi Doran di frakshon MFK a puntra den sala di parlamento kiko ta eksaktamente e trabou di Politur. Tin pensá pa bin ku un maneho ku ta mucha mas fuerte pa loke ta trata protekshon di turistanan den nos pais? Tin posibilidat si ta skarsedat nos tin di mas polis den kuerpo pa involukrá VKC aserka pa hasi e trabou huntu ku polisnan? Por oumentá kastigunan riba atrako general i atrako riba turista ya komo esaki ta laga hopi trouma atras? Ta posibel pa tin un outoridat pa konstantemente tin protekshon pa nos hendenan i nos turistanan riba sierto lugánan entre otro playanan?

Giselle Mc William di frakshon MAN a menshoná ku e sektor di mas importante awor aki ta turismo i mester sòru pa e sektor aki no afektá nos hendenan ku ta traha trabou den turismo. Giselle Mc William a kompartí ku mester salbaguardia turismo pasombra Kòrsou ta pasando den un di su mió tempunan pa loke ta trata turismo. E parlamentario ta indiká ku ta pidi pa oumentá kastigu pa ladronisia di bestia, di outo, maltrato relashonal, i tambe atrako kontra di turista. Frakshon di MAN ta bini ku e amendianan aki pa salbaguardia personanan di nos komunidat pero tambe turista, segun e parlamentario ta splika.

Politur ta haña nan ku diferente asistensia ku nan tin ku atendé kuné entre nan  ladronisia di pertinensha di turista kual mayoria biaha sa sosodé ora kibra den vehíkulo ku e turistanan hür. Gran parti di e ladronisia nan aki sa sosodé den aria di laman ora ku e turistanan bai landa i òf atmirá bunitesa di nos playanan.  Otro delito ku Politur ta haña nan ta atendé ku  frekuensia últimamente ta atrako i òf ladronisia ku violensia riba turistanan. Pa por hasi esaki manera mester ta mester di mas personal kual  e intenshon ta ku e aña aki lo bai reklutá mas personal pa por ehersé e trabou manera mester ta.