Spesifikashon dje pagonan hasí na overtaim na ámtenarnan di skal 10 òf mas.

WILLEMSTAD – Kontrolaria General a saka un rapòrt pika atrobe tokante un investigashon adishonal di atministrashon di salario di aña 2019-2020 (promé parti) i tokante algun análisis di dato realisá pa detektá fout/iregularidat den e datonan di salario ku tin den e sistema di atministrashon di salario pa aña di servisio 2019 (di dos parti).

Den e rapòrt akí ta rekomendá Parlamento pa entre otro yama atenshon di Konseho di Minister, ‘pa revoká e desishon ilísito pa paga overtaim riba un base struktural na funshonario den skal ≥10’. Na 2019 a paga mas di mei mion florin inhustamente na overtaim dje grupo akí.

E rapòrt akí, ‘Atministrashon di salario 2019 (investigashon adishonal)’, ta trata e resultadonan tokante e tiponan di fout ku tin chèns di presentá den e datonan di salario pa aña di servisio 2019, den e sistema di atministrashon di salario. Promé a identifiká e tipo di foutnan ku por presentá, saliendo for di e punto di bista ku no tin mag di tin fout/iregularidat mes. A investigá 8 riesgo di fout, entre otro pago di overtaim na rason di 150% i 200%, loke kontra lei. Serka sinku (63%) di e riesgonan, a konstatá fout na un total di 10,8 mion florin, ku tin di aber ku e violashon di lei akí.

E foutnan akí tin di aber ku entre otro ku pago di overtaim na rason di 150% i 200% (5,4 mion florin), uso indebido di e kompensashon di artíkulo 9 (1,8 mion) i pago di suèldo sin base hurídiko (mínimo 2,8 mion). E fout di mas grandi ku a konstatá ta pago di overtaim na rason di 150% i 200%. Pa gran parti ta ministerio di Hustisia ta okashoná e fout akí, na un total 3 mion florin. Pago di overtaim na rason di 150% i 200% ta inkorekto ya ku esaki ta kontra LMA i e reglamento di Kuerpo Polisial Kòrsou. Ademas Kontrolaria tin duda den e suma total di algu mas di 119 mil florin ku a paga na kolaboradornan di frakshon di Parlamento, pasó no por a kontrolá esakinan.

Ademas na 2019 a paga overtaim strukturalmente na ámtenarnan den skal 10 òf mas altu. Esaki ta violá LMA, ku ta regla ku no mag di paga overtaim na ámtenarnan ku ta kobra salario mas altu ku skal 9, esta skal 10 bai ariba. E Minister en kuestion por duna e ámtenarnan akí un kompensashon un biaha so si, den forma di tempu liber òf den kasonan spesial den forma di plaka tambe. Mester kalkulá e kompensashon akí pa ora i no paga esaki den forma di 100% dje salario pa ora. Sinembargo Konseho di Minister a disidí den armonisashon dje kondishonnan laboral na 2011, pa paga ámtenarnan di skal 10 òf mas tambe strukturalmente plaka di overtaim.

Pero e desishon akí no ta konforme loke tin pará den e LMA. “E desishon di Konseho di Minister ta ilegal i Konseho di Minister ta obligá di mantené su mes na lei. Ni e karta di e Presidente di Parlamento dje tempu ei, den kua a pidi e Minister di Asuntunan General pa outorisá e direktiva di Finansa dje tempu ei pa akordá di forma kontinuá e pago dje overtaim na empleadonan di grefi di Parlamento. Esaki pues tabata un petishon pa aktua kontra lei.” Segun Kontrolaria General, pa por desviá dje LMA ta rekerí un ahuste pa medio di un ordenansa nashonal. Porlotantu, no tin base legal pa e pagonan na overtaim ku a tuma lugá mas ku un biaha. Na 2019 a paga 120 ámtenar di skal 10 òf mas un total di kasi 854 mil florin na overtaim. Kontrolaria ta kalkulá ku a paga kasi 583 mil florin inhustamente. Den e rapòrt Kontrolaria General ta duna un bista amplio di kuantu plaka kada ministerio a paga.

Kontrolaria ta rekomendá Parlamento pa entre otro yama atenshon di Konseho di Minister, pa revoká e desishon ilísito pa paga overtaim riba un base struktural na funshonario den skal 10 òf mas. Na mes momento, pidi Konseho di Minister pa no tuma desishon ku den su kalidat di poder ehekutivo, e no ta outorisá pa tuma.