Servisio meteorológiko ku nan boletin di siman tokante wer aktual.

Willemstad,– Den e boletin semanal di servisio meteorológiko, meteorólogo Denrick Rombley, ta splika ku e tópiko e kalor ta keda e tópiko di último dianan.

Segun Denrick Rombley, e temperaturanan haltu den luna di sèptèmber ta kontribuí na e kalor e último dianan. Segun Rombley e rason pa e kalor ta debí ku e posishon di solo ta mas serka  di mundu e luna aki kompará ku otro lunanan di aña. Komo ku e solo ta mas serka, e rayonan di solo ta mas fuerte tambe, kual ta kousa mas kalor. Tambe meteorólogo Rombley ta splika ku dianan solo ta subiendo mas trempan i baha mas lat. Tambe Rombley ta splika ku nos humedat haltu na Kòrsou tambe ta sòru ku e sintimentu dje kalor ta mas potente. Tur esakinan ta kontribuí na un oumento di temperatura.

Alabes e tormenta tropikal Earl kual ta posishon na altura di Jamaica a sòru ku nos tin ménos bientu den e region di karibe.

Segun servisio meteorológiko, awe nos lo sinti un temperatura máksimo di 34 grado Celsius i den oranan di anochi e temperatura lo baha na 27 grado Celsius. Tambe e resto di siman e klima lo keda mesun kos ku awe pero solamente mañan, djawebs 6 di sèptèmber,i djabièrnè, 7 di sèptèmber, tin 20% chèns ku awa lo kai.

Debí ku e bientu lo ta suak e dianan binidero, laman lo keda trankil ku olanan entre 0.5 pa 1.5 meter haltu. Mirando e kalor inmenso, servisio meteorológiko a implementá kódigo hel.