Klein Hofje: un palu na Klein Hofje dilanti e planta pa resiklá awa a stroba tráfiko

Mahuma—Segun Servisio Meteorológiko di Kòrsou, no tabata posibel antisipá e efektonan ekstremo di e tormenta ku a sorpresa Kòrsou djaluna atardi.

Den un komunikado, e servisio ta bisa di a konstatá ku ta biba pregunta den komunidat, si ayera tabata posibel pa alertá komunidat mas tempran. Lamentablemente esaki no a resultá posibel. Loke hustamente ta típiko pa e tipo di wer spesífiko ku a presentá su mes ayera, ta ku e por kambia basta apruptamente.

I segun Meteo, djaluna en bèrdat esaki tabata e kaso. Den kaso asina Meteo ta komuniká mas lihé posibel i e medio di mas efektivo ta emití Boletin Spesial na interesado nan via di number +5999 560 1089 di Whatsapp, Website (www.meteo.cw), Facebook (Meteo Korsou) i Weather-app.

For di den wikènt siklon Fiona tabata situá nort di Kòrsou i aktualmente e ta ubiká nort di region di Karibe. Esaki a resultá den un bientu suak for di sùit aki na Kòrsou. Meteo tabatin èkstra atenshon pa e patronchi di tempu aki, ya ku esaki hopi biaha por resultá den mal tempu pa nos ku ta bini for di sùit. Tambe por bira kalor. Djaluna tardi, ora e Meteorólogo di turno a konstatá ku tabatin un menasa pa mal tempu agudo, inmediatamente a saka un Boletin Spesial pa mal tempu (kódigo hel) alrededor di 17:40. Manera ta kustumber ora wer kambia apruptamente, ta emití Boletin Spesial. Despues di esaki a duna entrevista tambe na diferente radio i televishon.

E mal tempu a yega Kòrsou su kosta alrededor di 19:15 anochi na partinan ost i despues gradualmente riba otro partinan di e isla. Alrededor di 02.00 di mardugá, ora a mira ku ya no tin menasa pa mal tempu, a kanselá e Boletin Spesial. Meteo ta konsehá un i tur pa keda sigui nos informashonnan, debí ku e situashon di tempu pa e proksimo 2 dianan lo keda similar. Si konstatá ku tin mal tempu na kaminda, lo bolbe emití un Boletin Spesial pa esaki, entre otro pa medio di e broadcast nan menshoná.  E servisio ta invitá tur hende ku ainda no ta aboná riba e servisio di broadcast di Whatsapp (5999 560 1089), pa hasi esaki i asina semper risibí mensahe den kaso di kambio aprupto di wer.