WILLEMSTAD – Miembronan di frakshon di MFK den Parlamento, a aserká Presidente di Parlamento Charetti America-Francisca ku e petishon pa un reunion públiko konforme artíkulo 64 di Reglamento di Orden, ku e punto ‘Preokupashon di pueblo pa ku nan karchi di vota i preparashon pa próksimo elekshon di Parlamento’.

Kòrsou ya ta na ménos ku un aña for di elekshon pa skohe e próksimo 21 miembronan di Parlamento. Manera ya indiká den un karta ku pregunta dirigí na Minister di Planifikashon i Servisio Públiko (BPD) Ornelio Martina, siudadanonan ta alerta riba e situashon na aña 2021, kaminda vários siudadano no a risibí nan karchi di vota na kas.

Diferente dje kasonan ta trata di siudadanonan ku ROP a kambia nan adrès, den e sentido ku a pone nòmber di kaya den e diferente barionan. Esaki ta nifiká ku a eliminá adrèsnan ku tabata denominá komo ‘kavel’, ‘naast’, ‘nabij’, ‘z/n’ òf bario ku number. “Realidat ta ku durante e último 3 añanan no a duna niun bario nòmber di kaya nobo, ni tabatin kambio di nòmbernan di kaya. Sinembargo, ketu bai tin siudadao ku no por hasi nan kambio di adrès na registro sivil (Kranshi)”

Segun MFK, tin kaso tambe den kua konstrukshonnan ilegal a tuma lugá. Esaki a okashoná e situashon ku un siudadano no por inskribí ofisialmente na registro sivil, pasó e no tin un ‘adrès di kas’ ofisial di ROP (e servisio Ruimtelijke Orde en Planning), ku registro sivil ta aseptá. “Tin siudadano pues ku pa mas di 3 aña kaba ta den e situashon deskribí i ketu bai ta konfrontando problema pa por registrá nan mes di forma ofisial na registro sivil. Tin siudadano ku ta biba den kas di hür, pues ta e doño di kas mester bai registrá e kas di forma ofisial, di manera ku e hürdó por bai inskribí su mes ku e adrès konserní na Kranshi.”

E miembronan dje frakshon ta indiká ademas den nan petishon por eskrito ku tin kaso tambe den kua doño dje kas ta biba den eksterior, pues te ainda no a logra hasi e kambionan di adrès di e forma korekto. “Teniendo kuenta ku e tópiko akí tin di aber ku tantu e Minister di BPD komo e Minister di VVRP (Tráfiko, Transporte i Planifikashon Urbano), Ramón Yung, Juniël Carolina, Maria Nita, David Seferina, Gilbert Doran, Fergino Brownbill, Frenciss Lourens en Eduard Braam, ta deseá pa Presidente di Parlamento invitá Minister Ornelio Martina i Charles Cooper pa ta presente, p’asina Parlamento por debatí ku nan riba e tópiko akí.”