Segun Kamminga  e ponensia ku e desishon di gabinete Pisas 2 pa no kobra impuestonan di 2017 i añanan promé ta inkreibel.

AMSTERDAM/WILLEMSTAD – Roelien Kamminga di frakshon di koalishon VVD den Tweede Kamer a pidi Sekretario di Estado di Asuntunan Interno i Relashonnan di Reino (BZK) Alexandra van Huffelen splikashon tokante e intenshon di Ministerio di Finansa pa kambia e maneho di kobransa di Servisio di Impuesto Kòrsou.

Ademas e ta lansa e ponensia ku e desishon di gabinete Pisas 2 pa no kobra impuestonan di 2017 i añanan promé ta inkreibel i ku e esaki netamente lo a yuda e situashon finansiero di pais Kòrsou. E ke sa si Van Huffelen ta kompartí e opinion akí.

Kamminga a manda su preguntanan ayera pa e Sekretario di Estado. E ke sa na promé lugá si Van Huffelen ta na altura dje intenshon di Ministerio di Finansa pa ahustá e maneho di kobransa na Belastingdienst. “Bo ta kompartí e opinion ku ta imposibel ku di un banda ta eksonerá impuesto ku mester kobra den propio pais ainda, miéntras ku di otro banda ta hasi un apelashon na Hulanda pa usa plaka di impuesto hulandes pa finansiá proyektonan di reforma? Si no t’asina, por fabor splika dikon nò.” E Parlamentario hulandes ta sigui puntra: “Bo ta kompartí e opinion ku kobransa di debenan di impuesto di 2017 i mas bieu ainda por kontribuí na pone e presupuesto di Kòrsou na òrdu. Si t’asina, lo bo drenta den kòmbersashonnan ku gobièrnu di Kòrsou tokante esaki?”

Ademas e Parlamentario ke sa dje Sekretario di Estado kiko ta e base legal pa stòp aktivamente ku kobransa di debenan di impuesto di Kòrsou for di 2017 i mas promé i kiko ta e státus di e desishon/intenshon akí dje gobièrnu lokal. “Kiko e gobièrnu di Kòrsou a hasi mientrastantu for di un desishon similar na 2015 pa implementá e reformanan nesesario, i kiko abo a hasi e último añanan pa pone preshon riba esaki? Kon lo sòru pa den futuro tur ahuste polítiko i organisatorio nesesario ta implementá pa kaba i kiko mester hasi pa logra esaki?” Tambe Kamminga ke sa si Van Huffelen ta kompartí e opinion ku ta deseabel pa hinka e ahustenan polítiko i organisatorio akí den kuadro mará na kondishonnan pa por risibí sosten finansiero pa e reformanan. Si e no ta kompartí e opinion akí, e Serektario di Estado mester splika Tweede Kamer dikon. Finalmente e Parlamentario hulandes ke sa kon Van Huffelen ta relashoná e ahustenan den e maneho di kobransa di Kòrsou ku e karta mas resien di Kolegio di supervishon finansiero (CFT) den kua ta determiná ku e presupuesto di Kòrsou ainda no ta kumpli sufisientemente ku e stándarnan stipulá den artíkulo 15 dje lei di Reino, Rijkswet financieel toezicht Curaçao en Sint Maarten (RFT).