WILLEMSTAD—Miembronan di e Federashon Futbòl Kòrsou, a aserká dirigentenan di e federashon, ku un karta. Esaki den kual nan ta pidi pa direktiva di e federashon di futbòl lokal, kumpli debidamente ku desishonnan ku tin riba mesa.

Esaki despues ku Komishon Arbitrahe, ya for di dia 15 último a publiká nan desishon ku Hubentut Fortuna tabatin rason den nan alegashonnan i ku mester pone e final di temporada pasá entre Hubentut Fortuna i Atlétiko Saliña hunga. E ganadó di e wega aki, lo promové pa e promé divishon, ku su kampionato ya ta den su rekta final di e di 2 buèlta.

Sinembargo despues ku no tabatin ningun akshon i inkluso Hubentut Fortuna mes, den forma di protesta no a akudí pa mira akshon den nan wega programá e siman tras di lomba, a indiká pa posponé weganan for di inisio di e fin di siman aki i programá e wega final, promé ku sigui ku tur kos den futbòl lokal.

Tabata karta ku a konta ku firma di 18 organisashon, di kual 6 aktivo den promé divishon i inkluso rèfri Juniel ‘Araña’ Adelina. Tur tabata di akuerdo ku lo no tin futbòl e fin di siman aki, pendiente pa FFK anunsiá e fecha pa e wega ariba menshoná.

Sinembargo tabata ayera den oranan di atardi i anochi, ku kosnan a kambia bastante. Esaki na momentu ku un i tur a pensa ku lo no tabatin futbòl ayera.

Firma pa wega para mèrdia i bai flùit anochi

Esaki despues ku e karta a konta ku firma tambe di netamente rèfri Juniel ‘Araña’ Adelina, kende a konfirmá di lo ta sostené e lucha. Tabata ayera den oranan di mèrdia ku el a akudí i pone su firma bou di e karta, pero finalmente den oranan di anochi, por a mira Adelina dirigiendo e partido.

Firma pa wega para i 24 ora despues bai hunga

E ekipo di Scherpenheuvel, tambe ta otro ku a pone nan firma bou di e karta pa posponé e weganan i programá e final. Esaki tabata djaweps último i finalmente ayera tòg a kambia idea i a akudí na stadion pa mira akshon, enfrentando Centro Dominguitu ku si no a firma e karta.

Kenneth ‘Bob’ Bernabela

Relashoná ku esaki, por a konstatá ousensia di tékniko di e ekipo di Scherpenheuvel, Kenneth ‘Bob’ Bernabela ayera. Esaki debí ku e no tabata di akuerdo ku e desishon pa bòltu bèk, i a opta pa e si keda riba e desishon inisial i no a akudí pa dirigí.

Pendiente

Miéntras tantu ta pendiente pa e demas weganan programá pa mira akshon, durante di e fin di siman aki, pa mira desishon di e otro ekiponan.