Miami– Minister di Asuntunan Ekónomiko, Ruisandro Cijntje a bai profundo den historia na momento e la invitá èks diplomatiko Eldred Maduro komo su wespet na LoanDepot Park na Miami.

E invitashon ta un muestra di apresio na Maduro pa por bin presensia e wega entre Kòrsou i Venezuela bálido pa semi final den Seri di Karibe 2024 na Miami.

Eldred Maduro tabatin un karera diplomátiko eksitoso komo minister Pleni Potensiario pa Antia Hulandes 1975 pa 1978. Despues el a sirbi komo kònsul general pa Reino Hulandes na Argentina, Uruguay, Trinidad & Tobago i Region Karibe, Cuba i Zambia.

Na momento Cijntje a risibí e notisia ku Maduro, kende ta un ferviente fanátiko di beisbòl, ta na Miami, mesora e la kapitalisá riba e oportunidat pa invitá Maduro, kende alabes tin 88 aña di edat.

Un bon gesto sigur di Minister Cijntje, kende un biaha mas ta uza deporte pa ekspandé Kòrsou su alanan internashonalmente. Sr Eldred Maduro, atraves di su trayektoria internashonal a keda ku hopi kontakto internashonal sin menshoná e enorme eksperensia ku e por yuda kuné. Pabien i pa e bon desishon.