Minister di Hustisia na St Maarten a ninga pèrmit pa e Rapper Rich Kalash por presentá na e isla.

WILLEMSTAD— Un biaha mas e reper Rich Kalash mester haña di tende ku no ta dun’é pèrmit pa presentá i e biaha aki ta na St  Maarten.

 E minister di Hustisia di St Maarten señora Anna Richardson a informá e fundashon di karnaval na Sta Maarten ku ta SCDF ku ta  para pa The St. Maarten Carnival Development Foundation den un karta basta ekstenso riba 14 di aprel último ku e konosido artista esta e reper Rich Kalash  no lo wòrdu permití pa presentá durante di e evento internashonal anochi di Hip Hop ku mester tuma lugá dia 21 di aprel próksimo. Esaki ta konforme un análisis ku Kuerpo Polisial St Maarten a realisá. Den e karta e minister di hustisia ta splika ku na momento ku a hasi petishon pa ku e evento e lista di artista no a wòrdu presentá. E lista kompletu di esnan ku ta partisipá a wòrdu presentá den luna di Mart último. Manera ta hasi ku tur  pèrmit pa eventonan asina grandi mesora ta bai wak e seguridat di e públiko ku lo bai hasi akto di presensia kual a pone ku Kuerpo Polisial a bai hasi nan análisis pa ku e seguridat durante di e evento.

  E resultado di e investigashon a trese un advies negativo pa ku presentashon  di e reper Rich Kalash kual su nòmber mes ta Errich Sigmar Cristo  na St Maarten. E minister di Hustisia na St Maarten den su karta a sigui bisa ku den kuminsá mentu di e aña aki mes outoridatnan na Kòrsou a ninga un pèrmit pa e reper kalash por a presentá na Kòrsou debí na e parti di seguridat. Ta konosí di situashonnan ku tin aber ku e reper aki ku a laga situashonnan peligroso atras unda tabatin asta uso di arma ku resultado di hende herida. De fakto un organisashon internashonal di Polis asta mester a avisá pa evitá presentashon di e reper na Kòrsou. E desishon pa no laga e reper presentá na Kòrsou mester tabata basa for di e advies di e organisashon internashonal  di Polis. Tambe tin ku menshoná ku otro partinan manera Aruba, Hulanda i tambe asta Spaña tambe mester a bai kontra di e presentashon di Rich Kalash. Segun e minister ku Hustisia pa ku mantenshon di órden  públiko i tambe seguridat durante di e periodo di Karnaval na St Maarten esaki ta determiná ku e petishon pa presentashon  di Rich Kalash dia 21 di aprel próksimo i òf kualke otro fecha  durante e periodo di karnaval no por tuma lugá. Ku esaki kier ilustrá ku e konsierto internashonal di Hip Hop and  R&B por tuma lugá pero sin e presentashon di e reper ariba menshoná. 

Segun e minister e ta rekonosé si ku e desishon por ta un desapunto pa ku e organisashon i tambe e promotornan di e evento pa no laga Rich Kalash presentá i ku tambe algun kondishon ku a wòrdu mara na e pèrmit pa ku presentashon di sigur dos artista mas. Pero einan mes kier pa tur hende komprondé ku e desishon tuma aki ta pa tur hende mes su propio seguridat i pa ku e evento por kana safe. Esaki ta ilustrá un biaha mas ku e konosido reper ni ta haña lus bèrdè pa presentá. E biaha aki ta na St Maarten.