WILLEMSTAD – Minister di Infrastruktura i Maneho di Awa Mark Harbers a informá Parlamento hulandes resientemente ku gabinete Rutte 4 ta trahando riba un presupuesto di supsidio pa entre otro realisá tèstnan di buelonan eléktriko entre Aruba, Boneiru i Kòrsou. E paisnan akí ta ideal pa eksperimentá ku distansia.

Asina ela splika durante un reunion di Komishon Fiho di e Ministerio di Infrastruktura i Maneho di Awa e siman akí, riba pregunta di Parlamentario Daniel Koerhuis di frakshon VVD. A konvoká e reunion relashoná ku entre otro e karta dje Minister di dia 19 di desèmber aña pasá tokante e rapòrt di e progreso dje Programa di Akshon di Buelo Eléktriko Híbrido.

Un kantidat di 12 Parlamentario tabata presente. Aparte di Koerhuis, ta trata akí di Mahir Alkaya di frakshon SP, Raoul Boucke di frakshon D66, Ernst Boutkan di Volt, Derk Jan Eppink di JA21, Dion Graus di PVV, Wybren van Haga di Groep Van Haga, Habtamu de Hoop di PvdA, Suzanne Kröger di GL, Harmen Krul di CDA, Fahid Minhas di VVD i Lammert van Raan di frakshon PvdD.

Koerhuis a puntra e Minister kiko ta e státus dje kontribushon di e Fondo di Kresementu (Groeifonds) pa e buelonan eléktriko. E tabata ke un bishta aparte di Schiphol i e otro aeropuertonan regional. Minister Koerhuis: “Aparte di Aviashon den Transishon, lo pone un fondo di investigashon i supsidio disponibel pa buelonan eléktriko. Nos no ta hasi distinshon entre e aeropuertonan.”

Segun Minister Harbers, Aviashon den Transishon ta invirtiendo 264 mion euro inkondishonalmente i 119 mion euro kondishonalmente pa aselerá entre otro buelo ku hidrógeno i buelo eléktriko. “Otro aña tambe nos lo konsentrá riba investigashon di sosten pa fasilitá buelonan eléktriko. Tambe ta trahando riba implementashon di un presupuesto di supsidio pa entre otro realisá tèstnan di buelonan eléktriko entre Aruba, Boneiru i Kòrsou. Esei tambe ta un lugá ideal pa eksperimentá ku distansianan.”