WILLEMSTAD – Dia 21 di desèmber awó lo paga parti di “indexering” manera anunsiá. Asina Minister di Gobernashon, Planifikashon i Servisio Públiko (BPD) Ornelio “Kid” Martina a kontestá Parlamentario Michelangelo Martines di frakshon di KEM, riba su pregunta ki dia ta paga “loontrede”, “indexering” i otro demandanan na ámtenarnan, durante tratamentu di Presupuesto 2024 luna pasá.

Minister di Finansa Javier Silvania resientemente a entregá e dokumento amplio ku tur kontesta riba preguntanan ku Parlamento a hasi luna pasá tokante e proyekto di lei pa establesé Presupuesto 2024. KEM a nota ademas ku pa 2024 a presupuestá kasi 175 mion florin pa e Ministerio di BPD, pero ku pa 2023 e suma tabata kasi 169 mion. Ta trata di un oumento di 6,1 mion florin i KEM a eksigí un splikashon di esaki.

Segun gabinete Pisas 2, e oumento akí entre otro ta konsekuensia di e echo ku e gastunan di e programa di “Opleiding en Training” pa henter aparato públiko. “Ministerio di BPD ta esun enkargá ku ‘Government Academy’ i p’e motibu ei Ministerio di Finansa a pone 1,7 mion florin disponibel. Tambe a pone un montante adishonal di 2 mion florin riba e presupuesto di BPD pa preparashon di elekshon, ku lo tuma lugá na kuminsamentu di aña 2025. Tambe tin un oumento supstansial na SSO, kaminda a pone mas fondo pa paga lisensia di aplikashonnan tékniko, ku den añanan anterior no tabatin sufisiente fondo presupuestá p’e, sí tene kuenta ku e kontraktnan firmá.”

Otro motibu pa e oumento ta e subida di kantidat di psaport ku lo kaduká den e periodo di 2024 kompará ku 2023. Na 2024 un kantidat di 19.900 pasport lo kaduká. Esaki ta alrededor di 16 mil pasport mas ku 2023. Esaki ta nifiká ku e asina yamá “Afdracht Paspoortleges”, ku ta e parti di e tarifa ku mester entregá na gobièrnu hulandes, tambe ta oumentá i bira 858.400 florin. Sobrá oumento ta trata gastunan operashonal, manera entre otro di hür di edifisio i gastunan di vigilansia. Riba pregunta di KEM tokante un otro pòst den kua a subi e suma presupuestá di 2023 di 351.800 florin pa 567.500 florin pa 2024, gobièrnu ta splika ku ta trata akí di un oumento di gastunan básiko (i/òf operashonal) pa Minister Martina por hasi su trabou.