Willemstad – Promé Minister sr. Gilmar Pisas ta informá ku di parti di Gobièrnu di Kòrsou ta hasiendo tur loke ta posibel pa yuda suidadadonan lokal ku ke sali for di Israël.

Basa riba e informashon ku a risibí di parti Ministerio di Asuntunan Eksterior di Reino (Ministerie van Buitenlandse Zaken) a komprondé ku e Embahada na Tel Aviv i e servisionan di informashon di Ministerio di Asuntunan Eksterior di Reino ta yuda e personanan ku a registrá i ku tin un pasaporte hulandes i no riba for di unda nan ta bini.

Defensa Hulandes a manda un avión militar ayera i lo bai hasi esaki awe, mañan i djasabra pa saka personanan ku tin un pasaporte hulandes ku ke sali for di Israël. Banda di esaki Ministerio di Asuntunan Eksterior di Reino a indiká ku no por sa ku eksaktitut ku bou di e personanan ku ya a keda yudá por tin habitantenan di e.o. Kòrsou.

Gobièrnu di Kòrsou  ta hasi un yamada urgente na tur  suidadado di Kòrsou ku sa di un yu di Kòrsou ku tin pasaporte hulandes i ku ke sali for di Israël, pa nan subi riba e website Informatieservice Buitenlandse Zaken (nederlandwereldwijd.nl)  pa registrá nan mes òf yama e number di telefòn aki +31 247 247 247.