Minister Rob Jetten lo ta na Kòrsou pa firma un akuerdo pa fortalesé e koperashon entre e dos paisnan pa loke ta energia sostenibel.
Willemstad,– Rob Jetten, minister di klima i energia di Hulanda lo ta na Kòrsou di 15 pa 17 di mei próksimo komo parti di un biahe pa e islanan Aruba, Boneiru i Kòrsou.
E bishita ta den kuadro di klima i energia riba e islanan.
Despues di un bishita na Boneiru i Aruba, e minister lo ta na Kòrsou pa firma un akuerdo pa fortalesé e koperashon entre e dos paisnan pa loke ta energia sostenibel.
Dia 16 di mei, e minister lo duna un diskurso na e studiantenan di Universidat di Kòrsou i e lo bishita tambe e sentro di investigashon Carmabi.
Akinan e lo haña un presentashon di “Climate Change Curacao” tokante di e impakto di e kambio klimatiko aki na Kòrsou.
Despues riba invitashon di representantenan di e organisashon LGBTIQ di Kòrsou, e minister lo kombersá ku nan. E último dia di e bishita lo ta dia 17 di mei i e dia aki e lo ta di bishita na Curoil i e parke di bientu di Aqualectra. Esaki den kuadro di e benefisio energétiko di nos pais.