Despues di CMC i dòkternan di kas awó ta Klínika Capriles

WILLEMSTAD – Minister di Salubridat Públiko, Medio Ambiente i Naturalesa (GMN) Javier Silvania siman pasa  a presentá den sala di Parlamento durante un enkuentro públiko pa e asina yamá ‘vragenuur’ i a kontestá preguntanan di Parlamentario Ana Maria Pauletta di frakshon di PAR tokante Restrukturashon sektor di kuido di salú mental (GGZ).

Pero ela para ketu tambe na logronan di gabinete Pisas 2 durante e último dos añanan den sektor di kuido médiko. Durante su disertashon ela laga tur hende komprondé ku palabra kla ku e gobièrnu aktual a logra muchu mas, ya ku awó numa despues di 12 aña lo indeksá salario di por ehèmpel dje personal Klínika Capriles i e klínika lo risibí 3.9 mion florin pa problema agudo.

Silvania no a presentá na e ‘ora di pregunta’ planiá luna pasá, pa motibu di un malkomprondementu. E mainta ei e tabata di bishita na un instansia den sektor di kuido médiko. Promé ku ela a duna kontesta, ela rekordá ku ta apénas 4 siman e tin e Ministerio di GMN na su enkargo. Pero den mesun rosea ela para ketu na su propio logronan komo Minister nobo tambe. “Den 1 luna di tempu mi a sòru pa Capriles Kliniek haña 3.9 mion florin pa kubri défisit ku nan tin. Ayera (5 di aprel) Raad van Ministers a bai di akuerdo pa duna un forskòt di 3.9 mion den ‘tranche’. Esaki ta nifika ku tin kondishonnan mará pa por risibí kada ‘tranche’. Den e kontrakt tin pará duidelijk ku mester garantisá kuido na e pashèntnan i pago di salario na e trahadónan.”

Ela enfatisá e logro ku despues di 12 aña ta indeksá salario dje personal di e klínika. Ela rekordá Parlamento tambe ku fo’i 8 di mart ku ela sinta, ela pone tambe 1.8 mion florin disponibel pa dòkternan di kas haña pago, pasó nan ta traha anochi, mardugá i wikènt. I 19.6 mion pa Curaçao Medical Center (CMC). Un total pues di 25.3 mion. Silvania a splika ku e situashon aktual den sektor di salú mental ta di preokupashon. Tin fragmentashon den kuido, e lista di espera ta altu i e nesesidat di kuido ta altu dor di pandemia. E reto finansiero ku instansianan konserní ta enfrentá ta hasi reforma di e sektor di salú mental mas urgente ku nunka.

Dia 24 di aprel 2019 Hunta di Ministernan a aprobá dokumento ‘Visiedocument Geestelijke Gezondheidszorg 2019-2023’ (VVGz), den kua entre otro ‘selfmanagement’ ta pará sentral. “E vishon ta konektá ku e Plan di Maneho di World Health Organization (WHO) i Pan American Health Organization (PAHO), su konseho pa traha mas ‘community-based’ posibel.” Pauletta a pidi e ora di momentu, ya ku e liña di tempu dje ta finalisá e aña akí. Ela invitá Silvania splika Parlamento si e tin intenshon di prolongá e dokumento. I kua ta e akshon konkreto ku lo tuma den e kuadro di e dokumento durante aña akí i si lo bai prolongá esaki, i pa kuantu tempu. Ademas e tabata ke p’e Minister duna un bista aktualisá dje estado finansiero di tur entidat den e sektor di salú mental ku ta haña supsidio di gobièrnu, òf ku tin un kontrakt di kuido ku e Banko di Seguro Sosial, SVB. Tambe kua ta e rol di e asina yamá ‘regiegroep’, den kuadro di e sektor di salú mental. Riba e último akí, Silvania a bisa ku e ‘regiegroep’ lo no tin un ròl ainda. E lo evaluá si esaki lo mester i lo tuma un desishon apropiá.

Ta trahando riba un plan di ehekushon dje dokumento. No por a hasié promé dor di pandemia. Durante aprel i mei Silvania lo hiba kòmbersashonnan ku henter e sektor pa wak si mester aktualisá e dokumento. Ela a pone énfasis riba ‘tur’ stakeholder, inkluyendo PSI i Brasami. Ya ela dialogá ku direktor di Capriles Kliniek kaba tokante implementashon dje dokumento. Silvania lo trese tur hende huntu i riba mesun liña pa mehorá e kuido. Si e dokumento ta karga ku aprobashon ainda dje sektor, e lo prolongá esaki. Pero e no sa pa kuantu tempu ainda. E ke determiná tantu e kontenido komo e durashon huntu ku henter e sektor.

Silvania no tin un bista aktualisá ainda dje estado finansiero di tur entidat, pasó ta awó ela sinta. E lo bishitá tur fundashon, papia ku direktornan tokante nan situashon finansiero i problemanan. E lo sinta ku trahadónan pa haña informashon. “Ainda mi mester studia dokumentonan ku m’a haña. Asina mi kaba di pasa na tur instansia i haña bista real dje situashon finansiero, lo mi informá Parlamento i lo traha huntu ku e instansianan riba solushon.”