Javier Silvania, Minister Interino Salubridat Públiko.

Pietermaai—Segun minister Silvania durante diferente deklarashon den medionan di komunikashon, e no a risibi e rapòrt di KPMG riba CMC. E minister a hasta krítika parlamentario Giselle Mc William, riba su ponensha ku e minister lo ta gañando.

Pero segun KPMG den nan reportahenan, e promé resultadonan di nan investigashon a kuminsá drenta for di 5 Yüni 2023. Ta trata di e fase unda e KPMG su ekspertonan a duna resultado riba nan investigashonnan preliminar tokante e Organisashon i Proseso na CMC. Abase di e rapòrt diagnóstiko, KPMG a finalisá riba 15 di Yüni 2023 e parti riba Modalidatnan Finansiero. E siguiente dia, riba 16 di Yüni 2023, KPMG ta entrega tambe nan deskubrimentunan riba e Modelo di Tarifa apliká na CMC. Despues a tuma KOMG Hulanda kasi un luna pa entrega e siguiente fase. E Investigashon pa Efektividat a keda entrega riba 24 di Yüli 2023. I finalmente riba 23 di Sèptèmber 2023, KPMG a entrega su delaster fase, kual tabata esun di Kosto di Preis.

E fechanan di entrega ta konfirmá ku KPMG for di Yüni 2023 tabata entregando e rapòrtnan. Pero segun deklarashon di Javier Silvania durante Novèmber último, su persona no a risibi e rapòrt di KPMG. Probablemente, e minister a referí na e rapòrt final, pero for di Yüni 2023 ya tabatin rapòrtnan entrega. E fechanan di entrega for di Yüni por nifiká ku tabatin skondementu di e rapòrtnan pa minister.