Minister Silvania ta bisa ku Dierenbescherming no a entregá kuentanan anual i ku ta nan mes falta ku e lei di bienestar di animal no por a wòrdu ehekutá.

WILLEMSTAD, — Djasabra dia 17 di febrüari minister Javier Silvania ta kompartí via retnan sosial ku Dierenbescherming no a entrega kuentanan anual i pues esaki ta e motibu dikon nan no lo risibí NAf. 300.000 komo supsidio.

Minister Javier Silvania a komentá riba Facebook ku Dierenbescherming ta bai live bai gaña riba minister i ku GMN no a kòrta den nan supsidio. Minister di finansa ta menshoná ku al kontrario, den 2024 e fundashon su supsidio ta subi ku 30 porshento. Pero tambe minister Silvania ta menshoná ku e fundashon no a entrega kuenta anual i ku mester risibí esaki pa asina minister por duna kuenta kon ta gasta sèn di pueblo. Segun minister di finansa e fundashon no a entrega kuentanan anual i esaki ta e motibu dikon nan no lo risibí e sèn.

Minister Silvania ta komentá ku ta falta di e fundashon Dierenbescherming mes ku e lei di Bienestar di animal no a wòrdu implementá for di 2023. Esaki debí ku nan no a entrega kuenta anual ku mester keda auditá. Pues minister Javier Silvania a duna di konosé ku no ta duna e fundashon NAf. 300.000, kual ta sèn di pueblo asina asina.