WILLEMSTAD,– Ministerio Públiko di Kòrsou (OM CUR) a konstatá un oumento kla di trafikashon di menornan di edat, partikularmente entre Venezuela i Kòrsou. Ku motibo di e echo aki, Ministerio Públiko ta duna un atvertensia severo na tur e personanan impliká, inkluso mayornan i tutornan, pa nan desistí di komete e akto kriminal aki.

E muchanan trafiká tin entre kuater i 15 aña di edat, i frekuentemente nan ta biaha riba embarkashon ku alabes ta transportá droga i armanan di kandela. E transporte di menornan di edat riba embarkashon ta trese kuné un riesgo enorme. E barkunan chikitú por kapsèis fásilmente durante e travesia, pues e muchanan ta kore riesgo di hoga. E echo ku tin supstanshanan ilegal i armanan di kandela na bordo ta peligrá e bida di e grupo vulnerabel aki ainda mas. OM CUR ta atvertí públiko ku trafikashon di menornan di edat ta un infrakshon grave di lèi ku ta wòrdu kastigá severamente. P’esei, e tipo di kaso aki ta wòrdu hopi na serio. Ta supliká komunidat pa ta alerta riba e tipo di kriminalidat aki, pa denunsiá kasonan na polis i pa atvertí otro hende di e peligernan ku trafikashon di menornan di edat ta trese kuné, tantu pa e muchanan konserní komo pa sosiedat.