Mariens Mariano no por wòrdu kondená den e ladronisia di 600 kilo.

NIeuwe Haven,– Korte di apelashon ta konfirmá e veredikto ku e èks polis, Mariens Mariano, no por keda kulpá den e ladronisia di 530 kilo di kokaina for di warda di polis Rio Canario.

Den realidat ta trata di un ladronisia di 530 kilo di kokaina mas 14 kilo di mariwana , pero den boka di pueblo e kaso ta konosí komo e “kaso di 600 kilo”. Ta trata di un ladronisia ku a tuma lugá den anochi di 13 di òktober bai kue 14 di òktober 2018. Ta algun ratu despues outoridatnan a diskubrí ku e lote di droga a disparsé. Ta trata di un lote di droga ku kuerpo polisial a konfiská riba 15 di sèptèmber 2018 ku 28 di sèptèmber 2018, pues e droga tabata den déposito den e departamentu di narkotrafikashon kasi 1 luna largu.

Ministerio Públiko tabata konvensé ku Mariens Mariano tabata tras di e ladronisia komo ku tabata tin diferente deklarashon ku ta testiguá ku Mariano ta embolbí. Den su totalidat Ministerio Publiko a usa 8 diferente prueba kontra di Mariano. Apesar di e 8 pruebanan, korte di apelashon a bai di akuerdo ku e diskushon di e abogado, kende a diskutí ku no por konfia e deklarashon nan kontra di Mariano mirando ku tin un kantidat di deklarashon di testigunan anónimo ku no por wòrdu verifiká, pues e deklarashon nan konserní no ta konfiabel.

Nos leinan penal ta dikta ku na momentu ku usa deklarashon nan di testigunan anónimo pa inkriminá un persona, mester di tin prueba pa verifiká ku deklarashon konserní. Sinembargo e prueba di verifikashon mester originá for di un fuente ku no ta anónimo. Ta asina ku e testigunan anónimo A18 te ku A22 a duna diferente informashon tokante e ròl di Mariano den henter e ladronisia, pero ningun deklarashon no por keda verifiká, pues lokual A18 te ku A22 a papia no por wòrdu konfiá.

Durante tratamentunan anterior Ministerio Públiko a indiká na hues ku e rumannan Judrick Urbano i Rashid Urbano tambe lo tabata embolbí den e robo di 600 kilo. Pero riba e promé fecha di tratamentu di apelashon, riba sorpresa di un i tur, Ministerio Públiko a pidi korte pa anulá e akusashon ku e ruman nan Urbano tabata embolbí den e ladronisia dje 600 kilo.

Banda di e ladronisia di e droga kaminda OM mes a opta pa no pèrsiguí mas, e ruman nan a keda akusá di a intentá di asesiná un víktima riba 22 di novèmber 2021. Ta asina ku den kaso di ámbos ruman korte di apelashon a indiká ku nan ta mantené e kastigu ku e hues anterior a imponé. Kual ta un kastigu di 5 aña pa Judrick Urbano i un kastigu di 9 aña pa Rashid Urbano.

Aktualmente tantu e defensa di e hòmbernan komo Ministerio Públiko tin e derechi pa bai korte di kasashon. Tur dos partido tin e derechi pa hasi esaki denter di 24 dia.