WILLEMSTAD,– Djasabra último Curaçao International Crowned Queens (CICQ) a marka historia na nivel nashonal, introdusiendio un kompetensia di foro hubenil entre e 8 partisipantenan di Miss Teen Curaçao International 2023.

E kompetensia ku a tuma lugá den studionan di KONTENTU na Sambil Curaçao tatin komo meta pa konsientisá, eduká i inspirá nos komunidat tokante problemátikanan interesante, relevante i di sumo importansia pa desaroyo di nos pais.

CICQ su aspirashon pa krea lidernan ku vishon i ku pa medio di nan bos ta trese kambio signifikativo pa nan generashon. Netamente esaki ta e motibu di kual CICQ a bini ku e inisiativa pa brinda nos hóbennan un plataforma pa vosiferá nan opinion riba problemátikanan bou di nos hóbennan aki na Kòrsou.

CICQ por mira bèk riba un anochi sumamente eksitoso, kaminda nos 8 damanan a paralisá Kòrsou ku nan inteligensia, elokuensha i kontenido, enfatisando riba diferente tópiko ku ta un tabú aki na Kòrsou.

Finalmente e anochi a ser klousurá ku e siguiente resultado. Ambar Ursulita Tovar, di dos finalista mihó foro hubenil, Svenja Rosalina, promé finalista mihó foro hubenil i e ganadó mihó foro a resultá Genesis de Oliveira.

Miss Teen Curacao International ta felisitá kada un kandidata pa nan balentia, disiplina, determinashon i motivashon. Paso e esensia di beyesa ta keda reflehá na momentu ku nos realisá ku ‘beyesa ta muchu mas ku simplemente ta bunita’.