Minister di Hustisia Shalten Hato.

WILLEMSTAD – E ‘black-out’ di ántayera a para hopi trabou i otro kosnan di hasi. Asina tambe e reunion di Parlamento ku Minister di Hustisia Shalten Hato, riba petishon di Parlamentarionan Steven Martina di frakshon di MAN i Gilbert Doran di frakshon MFK, mester a para. Te ainda no tin un fecha nobo pa e ‘momentu di pregunta’ (vragenuur) ku e Minister pa trata e ‘Situashon di Stichting Gezinsvoogdij’ (GVI) i tambe e ‘Instrukshon Polisial Kòrsou (ambts- en geweldinstructie).

Frakshon di MAN a tuma nota di e desishon pa kuminsá e proseso pa manda GVI fayit. Doran su petishon pa e reunion tin di aber ku e desishon di Ministerio Públiko pa pèrsiguí un agente polisial pa algu konsiderá di tabata kontra di lei. Ta trata akí di un agente polisial ku a usa su arma di kandela reglamentario durante un atrako, miéntras ku aparentemente e no mester a hasi esaki.

E ‘ora di pregunta’ ta un inovashon reglá den artíkulo 96a di e Reglamento di Orden di Parlamento, ku ta hasi posibel ku por yama un Minister pa bin kontestá preguntanan por eskrito den un reunion den sala di Parlamento. E posibilidat di ‘vragenuur’ i ademas ‘interrupties’, esta ku por interumpí un kolega den Parlamento na palabra, a drenta na vigor na febrüari, despues ku a adaptá e Reglamento di Orden. E Minister na kua a hasi pregunta lo kontestá esakinan den un reunion spesial pa kua no mester di kuórum, manera ta e kaso ku tur otro reunionnan di Parlamento.

E reunion por start manera ku esun ku a hasi e preguntanan i e Minister ku mester kontestá, ta presente den sala. Na kuminsamentu di e reunion e Parlamentario ku a hasi e pregunta ta haña e oportunidat pa duna un splikashon mas amplio tokante su preguntanan, pa despues e Minister kontestá. Ora ku e Minister kaba di kontestá, e Parlamentario en kuestion ta haña algun minüt kòrtiku mas pa hasi pregunta adishonal. I si e Minister kontestá e preguntanan akí tambe, e ora ei tur Parlamentario presente ta haña 2 minüt pa nan tambe hasi pregunta tokante e mesun tema. Ora e Minister kaba di kontestá e preguntanan ei, e ora ei e ‘vragenuur’ a kaba. Manera e nòmber ta bisa kaba e momento di pregunta akí mester dura máksimalmente un ora, pero Presidente di Parlamento tin e oportunidat pa prolongá esaki ku 15 minüt si ta nesesario.

Te ainda no tin un fecha nobo pa e reunion ku Minister Hato. Ta konvoká e tipo di reunion akí, kada dos siman.