WILLEMSTAD – Djamars 11 di yüni na sala di yegada di Curaçao International Airport, Minster di VVRP señor Charles Cooper a entregá e pèrmit pa ekstendé i konstruí na edifisio di aeropuerto un lokalidat pa asina Marshe Food Corporation por inisiá ku konstrukshon di ‘Victoria Gelati’.

Durante e seremonia ofisial, por a konta ku presensia di Minister Charles Cooper, representantenan di ROP, Curaçao Airport Partners, Curaçao Airport Holding, team di maneho i konstrukshon di Victoria Gelati, tambe famia i konosínan.

E konstrukshon di Victoria Gelati lo tuma lugá na e edifisio eksistente situá na sala di yegada di CUR International Airport. E plan ta pa ekstendé e edifisio eksistente i hasi esaki mas grandi pa asina por inkluí un lugá di sinta na parti pafó. Durante e seremonia ofisial, e Direktor di Marshe Food Corporation, Cedric Sprock, a duna di konosé ku segun nan kalkulonan e lokalidat lo tin kapasidat di 80 asiento paden i 40 asiento pafó. Tambe e la menshoná ku e nòmber Victoria Gelati ta bini di e palabra viktorioso. Esaki ta inspirá pa motibu ku despues di basta dia i lucha nan a logra haña e pèrmit di konstrukshon pa asina por kuminsá ekspandé i remodelá e punto di benta nobo aki. Ademas, Cedric Sprock a splika ku e logo ta representá un V di Victoria i un G di Gelati. E V den e logo ta simbolisá e ‘cone’ di eiskrim i e G ta simpolisá e bola di eiskrim ku riba dje tin un ‘cherry.’

E meta ta pa tantu turistanan ku ta sali for di e sala di yegada, komo personanan ku ta bin i risibí famia i ser konosínan,  sinta paden i òf pafó di e empresa i disfrutá di un gelato. Victoria Gelati lo produsí gelato italiano original ku un toké karibense. Algun di e sabornan ku Victoria Gelati tin di ofresé ta entre otro eiskrim di pistacho, amareto, koko, sorsaka, tamarein, i tambe passion fruit.

Na final di e seremonia ofisial,  tim di maneho di Victoria Gelati a anunsiá ku entrante sèptèmber 2024, Curaçao International Airport lo konosé un restorant di gelato nobo brindando sabornan produsí ku produktonan lokal i internashonal.