Otrobanda—Netto Bar ta e bar ku tin mas aña di eksistensia na Kòrsou. Djasabra 19 di Desèmber tras di lomba, e bar a kumpli 66 aña di eksistensia ku esaki e ta keda komo e bar di mas tantu aña ku tin aki na Kòrsou.

Sr.  Ernesto ‘Netto’ Koster a establesé e bar aki den aña nan 50 i e bar a habri 18 Desèmber di aña 1954 despues di esaki e la retirá ku su 87 aña. Sr. Netto a bin fayesé ku su 89 aña lagando su man drechi ku ta Sr. Jesus “Chu” Zimmerman na mando di Netto Bar.

Sr. Chu a splika ku for di su 16 aña e la kuminsá traha na Netto Bar te awor aki ku e tin 62 aña. Netto Bar ta konosí pa su espesialidat ku ta Ròm bèrdè ku awa di koko. Sr. Netto a kuminsá produsí e outéntiko i original Ròm bèrdè temporada e tabata yòn. Persona nan di tur edat tabata di akuerdo ku e Ròm bèrdè di Netto tabata esun mihó.