Kaya Merida– Djárason 9 di ougùstùs 2023 alrededor di 20.33’or, Sentral di Polis a risibí notifikashon ku tin un kas na kandela den Kaya Merida. Na yegada di e unidat polisial, a bin topa ku un kas parsialmente na kandela.

For di investigashon na a e sitio a sali na kla ku ta trata di un wela ku ta biba ku su tres nietunan di respektivamente 4, 5 i 8 aña den e kas. Na dado momentu e wela a bai drumi ku dos di su nietunan i esun di tres a mira e oportunidat pa bai hunga ku kandela den un otro kamber pone ku esaki a pega kandela. Bisiñanan a kuminsá purba paga e kandela. Despues personal di brantwer a yega rápido na e sitio i a lográ paga e kandela. Komo konsekuensia di e kandela aki e kamber i e plafòn a sufri daño di awa i huma. Personal di Skuchami tambe a wòrdu solisitá na e sitio pa atendé ku e muchanan ku a spantá inmensamente.