Skalo– E kompania aleman SGS Inspire, a konsehá pa Kòrsou kuminsá kumpra kombustibel di kalidat for di Estádos Unídos. Nan ta konkluí ku e mal kalidat di kombustibel na Kòrsou ta forma e.o. kontaminashon. SGS a kompará e parametrikonan oropeo i konkluí ku na e momentonan aki Kòrsou ta na nivel di Euro 3 i mester yega na Euro 5.

Pero maneho di Curoil riba kompra di kombustibel ta bai segun e sistema di tender i provedornan ku mihó preis kompará ku kondishon di kalidat, ta gana destaho i por entrega. Segun SGS, Kòrsou, Aruba i Boneiru por kumpra un konhunto for di Estados Unidos. Un konseho kuestionabel ku alabes no ta kuadra ku e sistema di tendering.

Aparte di e maneho di kompra, e kambio di Euro 3 pa Euro 5 tei kosta e konsumidó mas tantu sèn, nifikando ku kosto di transpòrt na Kòrsou tei subi, si ehekutá e rapòrt. Segun resultado di e estudio, e kalidat regulatorio di kombustibel na Kòrsou falta parametrikonan di kalidat, kual por afektá prestashon di vehíkulonan. SGS den nan konklushon a pone un relashon entre e falta di kalidat i mal prestashon di vehíkulonan. Segun SGS, na Kòrsou tabatin bastante reklamo riba vehíkulonan ku no ta prestando konforme fabrikashon. SGS no a identifiká “kuantu” spesífikamente. Nan ta rekomendá pa hisa e kalidat di kombustibel i implementá un sistema pa monitoria kalidat di kombustibel. Introdukshon di un mihó kalidat lo hisa e preis pa galòn di kombustibel. Resientemente MEO a saka un anunsio ku Kòrsou ta bai kumpra gasolin na nivel di Euro 4.

Segun SGS e nivel di sulfur tantu den gasolin i diesel na Kòrsou tabata demasiado haltu. E konklushon aki di SGS ta basá riba un muestra no deskribí i sin detaye di proseder i kompilashon.  Riba e problema di sulfur, tantu doñonan di pòmp komo Curoil ta pensa ku esei tabata posibel pasobra durante Covid, hopi tanki na pòmp a keda largu yená ku kombustibel, lokual ta krea humedat i mas reakshon, ku ta afektá e kalidat di gasolin. SGS ta papiando di kontaminashon ku por ta okashoná pa tankinan frus òf falta di sufisiente kobertura flotante den e tankinan ku Curoil ta warda kombustibel..

Manera ta konosí, den kuadro di desaroyonan riba kalidat di kombustibel na Kòrsou, Minister di Desaroyo Ekonómiko, Ruisandro Cijntje,  a kondusí un destaho públiko. Meta di e destaho públiko tabata, pa skohe un kompania imparsial ku lo por ehekutá un estudio aktualisá riba normanan di kalidat di tantu Mogas 95 (gasolin) komo LSD (diesel) na Kòrsou. E kompania Aleman SGS INSPIRE ta esun ku a keda selektá pa ehekutá e estudio mirando nan konosementu, kapasidat i eksperensia amplio den e merkado di kombustibel.  SGS ta rekomendá pa ehekutá kambio den maneho di kompra.

Segun Yamil Lasten, na momento Curoil kumpra kombustibel riba merkado internashonal esaki ta sosodé konforme un liña di maneho estatal establesé pa gobièrnu. E direktor di Curoil a splika e proseso di kompra di kombustibel. Komo kompania di Gobièrnu nan mester atené na e proseso di diligensha responsabel. Na momento tin nesesidat di gasolin, Curoil ta emití un destaho unda provedornan por inskribí (tendering). Curoil seguidamente den un departamento interno, ta evaluá kua provedor tin e mihó oferta. Mas aleu tambe Lasten a splika ku tin liñanan di maneho stipulá pa gobièrnu riba kalidat di kombustibel na Kòrsou i Curoil mester keda mantené su mes na e liñanan di maneho. Tin un grupo di trabou pa stipulá e kondishonnan nobo riba e kalidat di kombustibel.

SGS den nan investigashon, a indiká ku tabata tin un posibel kontaminashon na 2020. Pa esaki, nan a uza muestra na sierto pòmpnan. Komo ku e parti di e investigashon aki no a kana na un manera ‘akadémiko responsabel a hasi diferente pregunta riba e parti di sampling di produkto, no por konkluí na unda e posibel kontaminashon di produkto a tuma lugá, te pa konkluí ken ta responsabel si òf no. SGS a indiká ku e liña di maneho ta ‘outdated’ anto ku e mester wòrdu revisá. MEO ta konsiderando e raport di SGS i posibel impaktonan ku esaki por tin riba ekonomia. Entrentantu a opta pa bai nivel di Euro 4.