Javier Silvania, minister di Finansas

Nieuwe Haven – Korte di Apelashon (Hof) a disidí ayera ku den sigur 3 kaso (e.o Miles Trucking i Orco Bank Ontvanger no por kobra algun mion florin na impuesto, pa motibu ku Minister di Finansa Javier Silvania di MFK, a lanta e konfiansa pa medio di su página sosial ku no tin nodi di paga e debenan fiskal bieu (di promé ku 2017) mas.

Ontvanger riba pregunta di Hof a indiká ku e Minister no ta disidí sin mas, ya ku ta na Ontvanger ta disidí na kobra òf nò. Pero esaki no a yuda. T’asina ku na desèmber 2018, Inspektor di Impuesto a manda kobra Orco Bank NV 913.825 florin na impuesto riba ganashi. E banko a entregá un opheshon kontra esaki na yanüari 2019 i na apelá na ougùstùs 2020 kontra e echo ku no a tuma un desishon riba su opheshon. Na yüli di mesun aña Korte a deklará su apelashon fundá, pero su opheshon mes infundá. E siguiente luna e banko a apelá e desishon akí. A trata e apelashon dia 24 di mei último. Durante tratamentu dje kaso, a trata tambe entre otro Orco Bank Investments B.V.

Orcobank ta un instituto bankario mará na supervishon di Banko Sentral di Kòrsou i St. Maarten (CBCS). E banko aki a funda Orco Bank Investment BV riba 3 di mart 2005, den kua e ta (indirektamente) 100% akshonista. E empresa yu Investment BV no tin pèrmit pa fungi komo banko i porlotantu no ta mará na supervishon di CBCS. Su aktividatnan ta inkluí invertí kapital den efektonan i depósitonan. E kaso den Korte akí ta relashoná ku tratamentu fiskal di Investment BV i su relashon ku Orco, esta e státus fiskal dje BV i e konsekuensianan fiskal dje transakshonnan finansiero entre ámbos entidat.

Den e kasonan ei ta papia di impuesto di ganashi di añanan 2011 i 2012 di respektivamente 1.586.310 florin i 1.145.100 florin, imponé na novèmber 2017. I tambe di impuesto di ganashi di añanan 2013 i 2014 di respektivamente 913.825 florin i 990.825 florin, imponé na mei 2018. Durante tratamentu di e kaso na mei último a tene kuenta tambe ku kasonan (tratá den Korte di Promé Instansia na Aruba), den kua ta papia di impuesto di benta di añanan 2013 te ku 2015 ku sumanan di 120.705 florin (2013), 162.693 florin (2014) i 473.423 (2015), imponé na òktober di aña 2018. Tambe a pone diferente but pa motibu di pago ménos di impuesto ku sumanan di 30.176 florin (2013), 40.673 florin (2014) i 222.558 florin (2015).

Pero promé ku e tratamentu dia 24 di mei último, hof a pidi e Inspektor pa bin ku Ontvanger tambe na e tratamentu di e kaso. Dia 15 di mei último, hof a informá e Inspektor tokante e petishon akí ku: “E preguntanan di hof lo ta dirigí riba e situashon di kobramentu di debenan fiskal di Orco Bank NV (mas spesífikamente e debenan di aña 2013), i mas generalmente dirigí riba e maneho di kobramentu ku Ontvanger ta praktiká (for di 2017 i mas promé).” Den e kaso di Investment B.V. tambe hof a pidi pa Ontvanger ta na Korte.

Pero for di na aprel kaba, hof a tuma nota di Silvania su pòst ku lo no kobra impuesto di 2017 i mas promé i komo ku tabatin kasonan den Korte andando rondó di esaki, hof a pidi Inspektor aklarashon. E Inspektor a manda e pregunta di hof pa Ontvanger ku a deklará: “Ontvanger ta deklará ku e Minister por solamente duna un konseho, pero ku desishon ta na Ontvanger. (…) E Minister ta responsabel pa loke e ta bisa, pero e Minister no por duna Ontvanger niun mandato, solamente konseho.” Abase di e not aki, Hof a opta pa trèk un liña i eksonerá tur debe di añanan anterior na 2017.