A keda pruebá ku e aksidente aki a tuma lugá ku un velosidat riba 100km pa ora.

Nieuwe Haven,– Aktualmente tin un konfushon enorme entre e deklarashon nan di OM na momentu ku a hiba demanda pa shofùr iresponsabel pa aksidente na Wacawa komparando ku aksidente ku a kousa morto na Schottegat Weg Nort.

Remarkabel den e aksidentenan ariba menshoná ta pa nota kon den un kaso fiskal a demandá un kastigu di 24 luna i den e otro kaso fiskal a indiká ku e shofùr no tabata tin meta pa kita ningun bida riba e dia dje aksidente, pues ta demandá “solamente” 240 ora di trabou obligatorio.

Akusadro D’Angelo K. kende lo a partisipá na un aksidente mortal na Wacawa a keda kondená pa un kastigu di 24 luna, pero e hóben Darren Dirk K. a keda demandá pa risibí un kastigu di trabou obligatorio di 240 ora di trabou. Den ámbos kaso, dos víktima enbolbí a bin pèrdè nan bida, pero e similaridatnan ta keda te einan. Mesora preguntanan a kuminsá subi riba mes tokante dikon pa e aksidente na Wacawa ta demandá prizòn i e shofùr enbolbí den e otro aksidente na Schottegatweg Nort ta demandá solamente 240 ora di trabou.

Diferente eksperto den lei a indiká ku e diferensha ta simplemente e echo ku den un dje kasonan por a prueba ku e shofùr tabata kore demasiado iresponsabel i den e otro aksidente no por a konkluí ku e shofùr a kore iresponsabel. Sinembargo, Prokurador Gerenal mr Eva Bos a indiká ku kore iresponsabel ku un velosidat haltu ta algu ku mester wòrdu kondená pisá i segun su informe, e hóben enbolbí den e aksidente riba Schottegatweg Nort no por prueba velosidat demasiado haltu.

E aksidente na Wacawa, investigashon a prueba ku e hóben nan enbolbí tabata kore ku un velosidat di alrededor di 147 km pa ora. Mas aleu, e hóben nan tabata pasa otro riba kaya públiko na Banda Bou ku ta un área konosí pa aksidentenan fatal. E aksidente na Schottegatweg Nort a prueba ku e akusado tabata kore ku un velosidat máksimo di 100 km pa ora, pero profeshonal den tráfiko a indiká ku kore outo 100 km pa ora no ta meresé un kondena di prizòn asina haltu.

 Un otro eksperto di nos leinan penal konfirmá ku e dos kasonan ta meskos ku un komparashon di apel ku pera. Den un kaso (aksidente Wacawa) tin prueba ku e vehíkulonan tabata kore demasiado iresponsabel i den e otro kaso (aksidente Schottegatweg Nort) no tin prueba di korementu iresponsabel.

Den nos leinan penal por nota tambe ku ta distinguí entre un aksidente ku morto i un aksidente ku morto kaminda e shofùr a kore iresponsabel. Segun nos leinan, un shofùr ku partispá den nos tráfiko kaminda su aktuashon a kulminá ku un aksidente kaminda un persona a fayesé, poer risibí un straf máksimo di prizòn di 4 aña òf but na altura di kategoria 4. Den e mesun artíkulo den nos leinan penal e lei ta agregá ku si e aktuashon tabata debí na responsabilidat e orei por oumentá e kastigu di prizòn na un máksimo di 6 aña òf un but na altura di kategoria 5.

Sinembargo ta importante pa agregá ku si akaso tin prueba ku e shofùr a konsumí alkohòl, e orei por dòbel e kastigu imponé.