No por duna fecha spesífiko, pero ta e intenshon pa introdusí e asina yamá ‘smart card’ mas pronto posibel.

WILLEMSTAD – Ministerio di Desaroyo Ekonómiko (MEO) ta kanando un trayekto kouteloso pa ku introdukshon di un alternativa pa e aktual Areglo di Makutu Básiko. Den e kuadro akí ta teniendo debido kuenta pa yega na un areglo ku ta muchu mas kontrolabel ku esun introdusí na 2012. No por duna fecha spesífiko, pero ta e intenshon pa introdusí e asina yamá ‘smart card’ mas pronto posibel. Asina Minister Ruisandro Cijntje a kontestá Parlamentario David Seferina.

Segun e Minister, ya kaba ta hasiendo prueba ku un sistema di registrashon di preisnan serka detayistanan di produktonan ku ta den e Makutu Básiko aktual, pa asina optené data ku por usa pa un kòntròl mas efektivo. “Tambe MEO a opta pa inkluí tur grupo di interes, inkluso importadónan den preparashon di areglo alternativo. Kontrali na pasado kaminda no a tene kuenta ku tur interes i no a tene kuenta ku e retonan den esfera fiskal, den e proseso ku ta kanando si ta tene kuenta ku esei. No por duna un fecha spesífiko, pero ta e intenshon pa introdusí e ‘smart card’ mas pronto posibel.”

Seferina tabata ke sa tambe ken ta bai ta enkargá ku investigashonnan riba preis di benta di piská. Segun Cijntje, investigashon i inspekshon di preisnan stipulá pa gobièrnu, ta na enkargo di tim di Inspekshon di MEO. Ya ta den un proseso pa optimalisá e prosesonan di ‘handhaving’ di e lei yamá ‘Prijzenverordening’. “A desaroyá pa promé biaha un maneho integral di ‘handhaving’. Klaro ku efektividat di ‘handhaving’ ta kai i lanta ku outoridat i sanshonnan atministrativo. Den konsulta ku WJZ ta trahando riba un ordenansa pa introdusí outoridatnan i sanshonnan atministrativo. Algu ku no por a hasi na aña 2012 ora a introdusí Makutu Básiko.”

E Parlamentario a puntra Cijntje tambe si por garantisá e kalidat di komestibel i kon ta bai garantisá esaki. Cijntje a enfatisá ku kalidat di komestibel i kòntròl di kalidat di komestibel, segun e asina yamá ‘Warenlandsverordening’ ta responsabilidat di Minister di Salubridat, Medio Ambiente i Naturalesa (GMN) i ‘Inspectie voor de Volksgezondheid’ ku ta resortá bou di je. “Minister di Salubridat, Medio Ambiente i Naturalesa lo mester tuma e pasonan nesesario pa sigui garantisá kalidat di komestibel.” E Minister ta kontestá meskos riba e pregunta di Seferina ‘ken ta bai keda responsabel pa kalidat di komestibel’.

Riba e pregunta si lo bai bin un òf otro instansia pa e konsumidó por hasi reklamo riba kalidat di produkto, e Minister ta ripití: “Manera ya menshoná, e instansia enkargá ku kòntròl di kalidat di komestibel ta ‘Inspectie voor de Volksgezondheid’. Einan tur hende por hasi reklamo relashoná ku kalidat di produkto.” E ta referí na e mesun kontestanan riba e pregunta di Seferina si por duna e kliente siguransa ku e kalidat di komestibel ta aseptabel i un preis hustu i pagabel. Finalmente e Parlamentario a puntra ki punto di salida Minister Cijntje tin pa preis ‘range’ pa kilo di piská ku e ke bai laga hasi un investigashon riba preis di piská. Cijntje: “Netamente mi a inisiá un investigashon riba preis di piská, pa yega na un regulashon efektivo, saliendo for di e punto di bista ku preis di algun produkto di piská mester ta na alkanse di un i tur, teniendo kuenta sí ku e arte di peska ta un ku su riesgonan mará na dje i gastunan kombustibel, salario ètsetera ku piskadónan tin.”