Sekretario general di NATO kua ta Jens Stoltenberg a garantisá nan ku nan ta monitoriando e situashon hopi di aserka.

Polonia: Presidente di Polonia Andrzej Duda a enfatisá ayera na e pueblo di Polonia ku ainda no ta konosí, ta ken a manda e misil. El a bisa esaki despues ku tabatin hopi indikashon i medianan a kuminsá papia riba e posibilidat grandi ku e misil lo a keda lansá for di Rusia.

“Nos ta trahando ku kalma i ku seriedat, asina Duda a bisa den un diskurso for di buro di seguridat nashonal na Warsaw kual ta kapital di Polonia. El a urgi henter e pueblo pa keda trankil i a asegurá nan ku Polonia ta konta ku e sósten di NATO.

Merka ta mandando ekspertonan pa investigá e sitio i e misil ku a keda lansá pa asina determiná di unda esaki a bin. Ta un investigashon huntu ku ekspertonan di Polonia, Duda a bisa.

Sekretario general di NATO kua ta Jens Stoltenberg, a bisa ayera ku ta importante pa analisá tur e echonan i tur e posibel pruebanan ku tin. El a bisa esaki despues di a papia ku presidente di Polonia. E sekretario general a manda su kondolensia na e pueblo i a garantisá nan ku nan ta monitoriando e situashon hopi di aserka.

Miembronan di NATO a reakshoná mesora riba e insidente. Algun tabata kouteloso den nan deklarashonnan, sin spekulá ken por a manda e misil ku a kousa e eksploshon.

Presidente di Merka, Joe Biden a papia ku Duda i a reafirmé ku Merka ta komprometí ku su aliadonan di NATO.

Presidente di Fransia Emmanuel Macron a pidi pa papia di e asuntu na e G20 summit kual mester tuma lugá awe kaminda diferente lider mundial lo topa otro kual entre nan tin Joe Biden.