Javier Silvania: segun e raport Reforma Servisio di Impuesto, tin hopi trabou pa logra kambia prosedernan na Servisio di Impuesto.

Piskadera– Segun un rapòrt riba Reforma Servisio di Impuesto, no ta fásil pa optimalisá Servisio di Impuesto di Kòrsou. E servisio ta mantené kabes riba awa ainda, pero ta evidente ku mester hasi hopi kos, i ku e kaminda, ni maske kua ruta kue, ta un kaminda largu.

E kantidat di retraso ta un indikashon ku no tin un solushon rápido (quick fix) bahá for di shelu ku lo resolvé e problemanan den un tiru. E Plan di Reforma di Servisio di Impuesto ku Vigilante tin ta indiká ku e Servisio di Impuesto di Kòrsou no ta skor altu kompará ku práktikanan internashonal di bon maneho, i ku tin hopi retonan pa konfrontá den añanan benidero.

 “Komo ku na e momentunan akí ya tin un trayekto di mehorashon den progreso i nos no ke interrumpí esaki pero alimentá esaki mas tantu posibel, e investigadónan ta duna e siguiente konseho. E promé liña ta pa e término kòrtiku. Den e liña akí ta nifiká ku tin ku wak prátikamente kon nos por eliminá e retraso, ku un manera di traha mas inteligente, adaptashon di sistema, konekshonnan entre sistema i enfoke mas dirigí riba resultadonan. E enfoke dje liña akí mester ta riba evitá trabou dòbel i eliminá trabounan “ad-hoc” i pa redusí bishita na bali mas lihé.”

Ademas e liña akí ta bon pa sostené e segundo liña (pa término largu). E liña akí por ta eksitoso solamente si solushoná e problemanan i retrasonan di mas grandi. “E segundo liña akí mester ta enfoká riba desaroyo di Servisio di Impuesto i tambe mas tantu riba sostené e fasilidatnan modèrno (manera sosten di IT i sistema modèrno di IT integral), personal bon kalifiká ku ta di train i prepará pa nan tareanan. E liña akí ta pidi tambe pa un maneho mas modèrno (ku mènos kantidat di kapa) i un fleksibilidat di personal mas grandi, kompará ku loke tin awe òf loke ta eksperensiá awe.”

Manera Vigilante ta menshoná den un otro artíkulo e tim investigadó ku a formulá e Plan di Reforma na aprel último, a usa e asina yamá Tax Administration Diagnostic Assessment Tool (TADAT) di IMF, pa haña un bista dje situashon aktual di Belastingdienst. E TADAT-framework ta basá riba 9 área di resultadonan di prestashon, yamá “Performance Outcome Areas” òf POA’s. E informe di evaluashon ta sigui e liña di e 9 POA-nan akí. Ta midi e ‘madures’ di e prosesonan akí basá riba 32 indikadó, ku ta mustra si e Servisio di Impuesto ta kumpli ku e práktikanan internashonal di bon maneho òf no, riba skala di A te D.

Un puntuashon A ta nifiká ku Servisio di Impuesto ta kumpli ku e práktikanan internashonal. Un puntuashon B ta nifiká ku tabatin bon prestashon, pero ainda no riba e nivel internashonal di bon maneho. Un puntuashon C ta nifiká ku tabatin prestashon débil kompará ku práktikanan internashonal di bon maneho. Un puntuashon D ta nifiká ku tabatin prestashon insufisiente, i ta duna e puntuashon akí si falta e informashon nesesario pa hasi un evaluashon ophetivo.

Pa POA 1 ku ta trata “Registrashon i integridat di e dosier di e pagadó di impuesto”, e skor ta dos biaha D. “Belastingdienst no a duna forma na inisiativanan òf prosesonan fiho.” Pa POA 2 ku ta trata “Maneho efektivo di riesgo”, a skor 5 biaha D. “A resultá ku no tin un forma formal ni informal di maneho di riesgo integrá den e kòntròl di Belastingdienst.” Pa POA 3 ku ta trata “Esfuerso pa kumplimentu boluntariamente”, a skor 4 biaha D. “Den Belastingdienst no tin un departamentu sentral responsabel pa brinda yudansa na e pagadó di impuesto. Sí tin personal di Inspekshon ku ta duna informashon na e bishitantenan na bali. Meskos ta konta pa Ontvanger. E mesun bali di kliente no ta integrá. I na Inspekshon ainda e enfoke ta mas riba e aspektonan material. No tin un sentro di yamada di Belastingdienst (call center).” Manera tur hende sa, entretantu sí.

Pa POA 4 ku ta trata “Entrega na tempu di aangifte”, a skor C, D i A. “E aangifte digital obligatorio ta un punto fuerte. E kontaminashon di Crib ta stroba e bista riba e porsentahe aktual di kumplimentu, pa loke ta trata e entrega na tempu di aangiftenan. No ta invitá e pagadó di impuesto ku ta warda restitushon na IB (impuesto di entrada). Tin retraso grandi den imponé impuestonan (taxatieve aanslagen).” Manera Vigilante a yega di splika, e ‘taxatieve aanslag’ akí ta un kalkulashon dje Inspektor di Impuesto di e montante ku e persona debe. E suma akí hopi biaha ta mas altu, pa duna insentivo na e persona pa e hasi aangifte tòg.

Eks Ministernan di finansas

E tim ku lo kombertí den e agentenan di ‘callcenter’ di Servisio di Impuesto entretantu a pasa nan treinen. Esaki tabatin durashon di 1 luna.

Segun minister di Finansa Javier Silvania mester drecha e servisio pa kliente. Entretantu a muebla e sentro di yamada. For 1 di aprel e servisio pa kliente akí di belastingdienst  ta operashonal. For di yanüari Tyron Boekhoudt ku ta miembro di e gabinete di Ministerio di Finansa ta e supervisor dje ‘callcenter’. E tim a sigui treinennan pa por prepará nan mes pa e trabou.