WILLEMSTAD – Minister di Desaroyo Ekonómiko Ruisandro Cijntje a splika Parlamento riba pregunta di Parlamentario Quincy Girigorie kiko ta e situashon aktual di e instalashonnan riba e waf. Na aña 2017 Damen a tuma e operashon dje waf na su enkargo. Pa motibu di resultadonan negativo serka Damen Shiprepair Curaçao (DSCu), no tabatin fondo èkstra disponibel serka CDM Holding pa por hasi e invershonnan nesesario pa kambio di instalashonnan tékniko.

DSCu mes ta splika ku e estado tékniko dje waf na 2017 no tabata na un nivel ku lo por a spera di un astiyero, prinsipalmente dor ku e waf tabata hopi bieu. Aparte di esei, a formulá un plan di invershon entre Damen i CDM Holding ku a keda ehekutá solamente parsialmente, mirando ku un gran parti dje presupuesto di invershon a bai na e ‘upgrade’ tékniko dje infrastruktura dje waf pa por trese e dos dòknan flotante. E último akí no a bira disponibel serka CDM Holding pa por hasi e invershonnan nesesario pa kambio di instalashonnan tékniko. “CDM Holding resientemente a risibí sosten finansiero di Hulanda pa por realisá e invershon akí di kambia instalashonnan tékniko riba e waf. Dor di e sosten finansiero akí tin un presupuesto di 12.5 mion dòler disponibel pa invertí den remplasamentu di instalashonnan tékniko. Sinembargo, e ehekushon pa drecha e estado tékniko dje instalashonnan akí mester warda un ratu, pa motibu di e reparashonnan tékniko kompleho ku mester tuma lugá i periodonan di entrega largu di nos suministradónan. Nos ta spera ku Damen lo por mustra e mehorashonnan operashonal ku a keda realisá den e promé kwartal di 2024 numa, dor ku un parti dje programa di invershon ta operasonal. E programa di invershon den su totalidat mester konkluí pa fin di 2025.”