Eni Carmelia: 28 aña total na Koraalspecht.

Nieuwe Haven— Korte di Hustisia den Promé Instansha, a konkluí ku no tabatin sufisiente prueba ku e hòmber Eni Carmelia a violá e hóben defuntu Rayzienne Raiza Scoop. Pa esaki, e hómber Carmelia a keda apsolv’é di e akusashonnan, pero pa e asesinato a risibi un kastigu kombiná di 13 aña akoplá ku demas 15 aña ku ainda e mester sinta, pa totalisá 28 aña.

Tampoko tabatin sufisiente prueba pa konkluí ku Carmelia a sende e kurpa di Scoop na kandela despues. Korte den Promé Instansha Carmelia a yega na konklushon ku Eni Carmelia ta kulpabel si pa morto di Rayzienne “Raiza” Scoop. E problema pa prueba e parti di violashon tabata pasobra ku demasiado a tempu a transkurí entre 31 di desèmber 2011 pa Mart 2012, dia  a deskubrí e kurpa sin bida di Scoop. Carmelia a sekuestrá i asesiná Scoop riba 31 di desèmber 2011. Despues e la bai bek, sende e kurpa na kandela pero riba esaki tampoko no tabata por a dun’é kastigu.

Pa yega na un kastigu, korte mester a evaluá ku no tabata por a surpasá e máksimo di 30 aña. A keda proba ku Carmelia a asesiná i hòrta e dama Raiza Scoop riba e dia en kestion. Pero, Carmelia tabatin un kastigu di 12 aña pa agreshon i violashon i despues el a logra hui skapa for di prizon unda e la bolbe aktonan di agreshon ku a dun’é 3 aña aserka. Ta trata di 15 aña i korte ta opiná si a trata e kasonan huntu, lo korte a yega na un kastigu di entre 25 pa 30 aña. Den kaso aki, Korte ta konkluí pa yega na un kastigu total di 28 aña pa Carmelia.

Carmelia a wòrdu kondena den e kasi pa robo i asesinato riba Raiza Scoop riba 31 di desèmber 2011. E la risibi 13 aña pa esaki pero ta sintando 15 aña. Korte a haña pruebá ku Eni Victorino Carmelia, nase na Kòrsou riba 11 di òktober 1990 ta kulpabel di a atraká, asesiná Raiza Scoop riba e dia en kestion. Pa lokual ta trata e asesinato kombiná ku violensha i robo, Korte a kompilá un kantidat di 18 prueba kontra di Eni Carmelia. Entre nan tabata kontra deklarashon di testigunan G.W., A.M., L.P., D.M., K.V.. Ademas Korte a uza pruebanan di sosten unda tabatin un rapòrt di desaparishon  di Raiza Scoop, entrega pa su ruman muhé Milouska Tomasa Scoop. Tambe komo prueba a uza e grabashonnan di vidio unda por a mira Raiza Scoop ta kana riba e Bonamweg den oranan di 6 ‘r mainta, 31 desèmber 2011. Esaki tabata apénas algun ratu promé ku Eni Carmelia a sekuestr’é den su outo. E vidio, a keda presentá na e mama i amigu/pareha di Scoop unda ámbos a rekonosé e persona kanando komo Raiza Scoop. Ma aleu komo prueba a sirbi tambe un investigashon forensiko riba 14 di yanüari 2020. E investigashon forensiko a regardá deskubrimentu di e restunan mortal di Raiza riba 19 mart 2012. A keda konkluí ku den área dje kurpa sin bida tabatin un kandela ku a tuma lugá.  Riba 21 di sèptèmber, un prima di Scoop, J.F a duna un deklarashon ku e telefon di Raiza ainda ta wòrdu uza pa deskonosínan. Tabata trata di un BB Phone, ku pin 217973A9. Kombiná ku deklarashonnan di testigu, reshèrshinan durante 12 aña a pone diferente relashon. Entre nan deskubrimentu di Raiza su leptop riba 7 òktober 2012 na e adrès Las Almas 56 serka e testigu L.P. ku tambe a keda interogá. I finalmente konsiderando e ariba menshoná na prueba, korte a añadí aserka e deklarashon di Eni Carmelia mes unda e la bisa di tabata biba na Rancho, e área unda Raiza a pèrdè i tambe ku e la kompartí sel ku e hòmber K.V., kende  duna deklarashon lokual Eni papia.

Despues di a skucha su veredikto djabièrnè último, Carmelia a komprondé e veredikto i kana sali. Den sala tabatin un bastante reshèrshi kendenan a traha riba e kaso atraves di aña. Tambe a nota miembronan di famia di Raiza Scoop inkluso su ruman muhé kende despues di e kaso a risibi konsolashon serka fiskal di Ministerio Públiko